Në orën 17:00 nisi seanca e dytë e Legjislaturës së X, ndërsa gjatë paraditës u zhvillua seanca e parë që pati më së shumti një atmosferë formale.
Kjo seancë shënoi rikthimin në Kuvend pas 2 vitesh e gjysmë të bojkot të Partisë Demokratike dhe Lëvizjes Socialiste për Integrim.
Në këtë seancë të dytë pritet të nisin edhe procedurat për zgjedhjen e kreut të Kuvendit, ku emri i propozuar nga maxhoranca është ai i Lindita Nikollit.
Seanca e parë u hap nga Luljeta Bozo, si deputetja më e vjetër, e cila i bëri thirrje deputetëve që të punojnë pa dallime partiake. Po ashtu u ngrit edhe komisioni i verifikimit të mandateve të deputetëve, i përbërë nga 5 përfaqësues të maxhorancës dhe 4 të opozitës.
Nga Maxhoranca, pjesë e komisionit janë Klotilda Bushka, Ermonela Felaj, Auora Mara, Nasip Naço dhe Toni Gogu, ndërsa nga PD janë Saimir Korreshi, Dhurata Çupi, Greta Bardeli dhe Belind Këlliçi.
Një deputet nuk mund të mbështesë më shumë se një kandidat. Kryetari i Kuvendit zgjidhet pa debat dhe me votim të fshehtë, me shumicën e votave, në prani të më shumë se gjysmës së të gjithë anëtarëve të Kuvendit. Në rast se asnjë nga kandidatët nuk ka fituar shumicën e kërkuar, vijohet me një raund të dytë, ku votohet për dy kandidaturat që kanë marrë më shumë vota. Pas përfundimit të procesit dhe pasi ka një fitues drejtuesi i seancës fton menjëherë Kryetarin e Kuvendit të zërë vendin e tij.
Konstituimi i legjislaturës së re të Kuvendit do t’i hapë rrugë miratimit të Qeverisë së re. Tashmë emri i Edi Ramës ka mbërritur në zyrën e Metës për tu dekretuar si Kryeministri i vendit, në zbatim të nenit 96 të Kushtetutës. Pas dekretit të Metës do pritet miratimi i Ramës nga Kuvendi.
Sipas Kushtetutës së vendit në qoftë se Kryeministri i emëruar nuk miratohet nga Kuvendi, Presidenti emëron një Kryeministër të ri brenda 10 ditëve. Në qoftë se edhe Kryeministri i emëruar rishtas nuk miratohet nga Kuvendi, brenda 10 ditëve Kuvendi zgjedh një Kryeministër tjetër. Në këtë rast Presidenti emëron Kryeministrin e ri. Kur Kuvendi nuk arrin të zgjedhë Kryeministrin e ri, Presidenti i Republikës shpërndan Kuvendin. Megjithatë duke pasur parasysh se në Kuvend kemi një shumicë solide me 74 mandate vetëm të Partisë Socialiste një problematikë e tillë nuk do të haset. Më pas Kryeministri i emëruar i paraqet për miratim Kuvendit, brenda 10 ditëve, programin politik të Këshillit të Ministrave së bashku me përbërjen e tij. Pas miratimit nga Kuvendit, para fillimit të detyrës, Kryeministri, zëvendëskryeministri dhe ministrat betohen para Presidentit të Republikës.
Në seancë u respektuan masat anti-COVID, ku deputetëve iu mat temperatura në hyrje të Kuvendit, ndërsa në sallë, duke respektuar distancimin social, ishin të pajisur edhe me maskë.
Vëmendja në seancën e sotme u përqendrua jo pak te ish-kreu i PD-së, Sali Berisha, i cili, për herë të parë në 30 vite, u ul në sallë si i përjashtuar nga grupi parlamentar i PD, pas vendimit të djeshëm të Lulzim Bashës. Ai u prit nga Flamur Noka, Tritan Shehu, Edi Paloka, Edmond Spaho deputetët që i dolën kundër Bashës për largimin e Berishës, ndërsa simpatizantë të shumtë i hodhën atij lule duke thirrur “Tradhtar, poshtë Amerika, poshtë Edi Rama”. Ai i ‘hapi luftë’ Bashës, teksa tha se ka bërë pakt me Ramën.
/b.h
