Ajo që ndodhi dje, 18 dhjetor, në parlamentin shqiptar ka shkaktuar bujë ndërkombëtare, pasi ligjvënësit e opozitës nuk lejuan dje zhvillimin normal të seancës plenare, duke u përplasur edhe fizikisht me punonjësit e Gardës së Republikës.
Kemi renditur pak nga ajo si e kanë përshkruar mediat e huaja situatën e pazakontë që u krijua në seancën e fundit në Kuvendin e Shqipërisë për këtë vit.
Al Jazeera: Brenda parlamentit të Shqipërisë u panë skena kaotike, ku një votim për zgjedhjen e avokatit të popullit për të drejtat e njeriut u shndërrua në një protestë nga politikanët opozitarë për shkak të pretendimeve për mashtrim zgjedhor dhe korrupsion.
Reuters: Opozitarët u përplasën me Gardën brenda Parlamentit të Shqipërisë të enjten, pas javësh tensionesh mbi akuzat për korrupsion ndaj zëvendëskryeministres dhe zyrtarëve të tjerë. Ligjvënësit ndezën flakadanë, hodhën ujë ndaj kryetarit të parlamentit dhe zunë vendet e ministrave duke penguar seancën.
The Telegraph: Parlamenti i Shqipërisë shpërtheu në kaos të enjten, kur deputetët opozitarë ndezën flakadanë dhe hodhën ujë gjatë një përplasjeje pas pretendimeve për korrupsion të qeverisë. Deputetët u përplasën me rojet, hodhën shishe ndaj kryetarit të parlamentit dhe zunë vendet e ministrave duke ndërprerë seancën parlamentare. Ata kërkuan të shohin provat për Belinda Ballukun, zv/kryeministre e Shqipërisë dhe ministre për Infrastrukturën dhe Energjinë. Zonja Balluku, aleatja më e afërt e kabinetit e kryeministrit Edi Rama, akuzohet për ndërhyrje në procesin e prokurimit publik në disa projekte të mëdha infrastrukturore. Këto projekte përfshijnë rrugën rreth Tiranës dhe një projekt tuneli me vlerë 190 milionë euro.
The Independent: Ligjvënësit opozitarë kanë shkulur mikrofonët, kanë hedhur shishe uji dhe kanë ndezur flakadanë, duke akuzuar Partinë Socialiste për korrupsion.
Fox News: Deputetët opozitarë u përplasën me Gardën brenda parlamentit të Shqipërisë të enjten, pas javësh tensioni mbi akuzat për korrupsion ndaj zv/kryeministres Belinda Balluku dhe zyrtarëve të tjerë të lartë.
Vijesti.me (media malazeze): Deputetët shqiptarë u përplasën me Gardën gjatë seancës parlamentare, duke u zënë, tërhequr njëri-tjetrin dhe duke ndezur flakadanë. Përplasja ndodhi gjatë votimit për Avokatin e ri të Popullit, zyrtarin kryesor për të drejtat e njeriut. Partia Demokratike akuzon Partinë Socialiste për mashtrim zgjedhor dhe minimin e demokracisë, çështje që po protestojnë prej muajsh.
Associated Press: Deputetët opozitarë hodhën shishe dhe shkulën mikrofonët e kryetarit të parlamentit, Niko Peleshi, i cili u kërkoi të respektojnë institucionin e parlamentit dhe paralajmëroi se “shtetin nuk mund ta shkatërrojmë kështu”.
Zhurma e Kuvendit “u dëgjua” dhe në Greqi, ku mediat kanë shkruar për aksionin e demokratëve kundër mazhorancës. Media “Protothema”, duke ndarë pamje nga përplasja mes deputetëve dhe Gardës së Republikës, shkruan se demokratët kërkojnë zbatimin e ligjit lidhur me çështjen Balluku. Gazeta cilëson gjithashtu se Balluku është e gatshme për bashkëpunim me drejtësinë, referuar fjalimit të saj të mëparshëm në Kuvend.
