Bastian Schweinsteiger ka bërë të ditur tërheqjen nga kombëtarja, pas 120 ndeshjeve të luajtura në 12 vjet me Gjermaninë. 31-vjeçari i Manchester United është një nga lojtarët me më shumë ndeshje me kombëtaren dhe luajti në pesë takime në Euro 2016, i fundit në gjysmëfinalen e humbur me Francën, ku ai shkaktoi penalltinë e golit të parë, në minutën e fundit të një pjese të dominuar nga skuadra e tij.
Schweinsteiger, i cili debutoi në arenën ndërkombëtare më 2004, fitoi Kupën e Botës më 2014, pas vendit të tretë më 2006 e 2010, ndërkohë që ishte edhe finalist në Euro 2008.
“I kam kërkuar trajnerit të mos më thërrasë më në kombëtare, sepse dëshiroj të tërhiqem”, shkruan kapiteni. “M’u dha mundësia të grumbulloj 120 ndeshje për vendin dhe kam jetuar disa momente që kanë qenë papërshkrueshmërisht të bukura e të suksesshme. Jogi Loew e dinte se sa i rëndësishëm ishte për mua Euro 2016 në Francë, sepse doja vërtet ta fitonim këtë titull që nuk kemi qenë në gjendje ta fitojmë që më 1996. Nuk ishte e thënë, duhet ta pranoj këtë.
Duke fituar Kupën e Botës më 2014 ne arritëm diçka në një nivel historik dhe emocional që nuk mund ta riprodhoj më në karrierën tim.
Prandaj është e drejtë dhe e arsyeshme për t’i dhënë fund e për t’i uruar skuadrës gjithë të mirat në kualifikueset për Kupën e Botës 2018.
Me këtë vendim largohem nga skuadra kombëtare, e cila ka qenë përherë një familje e çmuar për mua. Shpresoj që lidhja të mbetet e fortë,
Dua t’u them tifozëve: Ishte nder të luaje për ju. Shumë faleminderit për gjithçka që kemi kaluar bashkë!”, shkruan Schweinsteiger në deklaratën e largimit nga kombëtarja.
d.i.
