Italia ka vendosur të zgjasë edhe me 15 ditë kontrollet në kufijtë ajrorë dhe detarë me Spanjën, një masë që ka shkaktuar edhe reagimin e Madridit.
Vendimi i Romës i është njoftuar Komisionit Evropian, i cili pritet ta shqyrtojë, por burime nga BE-ja bëjnë të ditur se Brukseli nuk pritet të kundërshtojë publikisht masën.
Italia nuk është i vetmi shtet që ka rikthyer kontrollet në kufijtë e brendshëm të zonës Schengen. Aktualisht, dhjetë vende kanë vendosur masa të tilla, kryesisht për shkak të kërcënimeve terroriste dhe rritjes së flukseve migratore.
Komisioni Evropian kishte kërkuar në qershor që këto kontrolle të hiqeshin gradualisht dhe të zëvendësoheshin me masa alternative. Megjithatë, vetëm Sllovenia e ka ndjekur këtë kërkesë.
Gjermania ka njoftuar zgjatjen e kontrolleve kufitare deri më 15 mars, ndërsa Franca i ka vendosur ato në kufijtë tokësorë, detarë dhe ajrorë me disa vende fqinje. Kontrolle të ngjashme kanë rikthyer edhe Danimarka, Austria, Suedia, Polonia, Holanda dhe Norvegjia.
Edhe Italia ishte kritikuar më herët nga Brukseli për kontrollet në kufirin me Slloveninë. Pavarësisht kësaj, Roma i ka zgjatur masat deri më 18 dhjetor.
Rasti i Spanjës është veçanërisht i debatueshëm, pasi sipas burimeve evropiane nuk ka prova se migrantët që mbërrijnë në Ceuta po përdorin territorin spanjoll për të kaluar më pas drejt Italisë përmes zonës Schengen.
“Duhet të shpresojmë që kjo zgjatje të jetë e fundit”, është shprehur një zyrtar i BE-së.
Përballë rikthimit të kontrolleve nga një numër gjithnjë e më i madh shtetesh, Komisioni Evropian po has vështirësi për të kundërshtuar masat e qeverive kombëtare.
