I dërguari i posaçëm i Gjermanisë për Ballkanin perëndimor, Manuel Sarrazin, u bëri thirrje palëve për rikthim në dialog dhe implementim të marrëveshjes së Ohrit. Pas takimit, me presidenten e Kosovës Vjosa Osmani dhe më herët me kryeministrin Albin Kurti, ai tha se është e rëndësishme për gjetjen e një marrëveshjeje mes Prishtinës dhe Beogradit.
“Dialogu sigurisht që mund të vazhdojë dhe është e rëndësishme që të vijojmë përpjekjet për gjetjen e një mënyrë drejt zbatimit të marrëveshjes së Ohrit. Ajo që dëgjojnë Beograd dhe Prishtinë, është se marrëveshja është një gur themel dhe se mund të çojë në marrëdhënie pozitive mes dy vendeve. Por sigurisht, shohim se momentalisht ajo nuk është implementuar me sukses, dhe mendoj se ky nuk është momenti për të ndalur përpjekjet për zbatimin e saj. Është e kundërta”. Ndërsa në një postim në rrjetet sociale kërkoi daljen para drejtësisë të autoreve të sulmit.
Gjatë takimit me Sarrazin, Osmani kërkoi sanksionimin e Serbisë e cila tha, qëndron pas veprimeve terroriste dhe akteve të agresionit kundër Kosovës.
“Veprimet e tilla përbëjnë cenim të sovranitetit dhe integritetit territorial të Republikës së Kosovës dhe për këto veprime duhet sanksionuar Serbia”, ishin fjalët e saj. Presidentja e Kosovës deklaroi po ashtu se veprimet e Policisë në veri janë legjitime dhe në kuadër të “realizimit të detyrave kushtetuese, në mbrojtje të të gjithë qytetarëve, pa dallim”.
/a.r
