Kryetari Gjykatës së Krimeve të Rënda, Sandër Simoni duke folur për reformën në Drejtësi dhe pjesën që lidhet me shkrirjen e Gjykatës së Krimeve të Rënda, propozon ndërtimin e një Gjykate të posaçme për trafikun e drogës dhe terrorizmit.
Në një intervistë për Televizionin Publik, kryetari i kësaj gjykate, Sandër Simoni, deklaron se duhet të ngrihen gjykata të posaçme për trafikun e drogës dhe çështjet e terrorizmit duhet të vazhdojnë të jenë kompetencë e kësaj gjykate, pavarësisht ndryshimeve ligjore. “Numri i madh i çështjeve për trafik ndërkombëtar droge, rekrutimi i një numri të konsiderueshëm të shtetasve shqiptarë në vendet në konflikt në lindje si dhe ato ndaj terrorizmit, janë çështje të cilat mbeten jashtë juridiksionit të gjykatës së posaçme e cila pritet të ngrihet me ndryshimet e reja ligjore”, tha Simoni.
Ai deklaron se kompetenca e kësaj gjykate duhet të rishihet, pasi vepra të tjera penale që shqyrtoheshin më parë nga kjo gjykatë mbeten jashtë juridiksionit. “Ligji antimafia mbetet një tjetër paketë ligjore e rëndësishme në shqyrtimin e çështjeve me karakter konfiskimin e parave që vijnë nga krimi i organizuar e që nuk përfshihet në kompetencat e gjykatës së re. Trendi i kësaj gjykate këto dy vitet e fundit është ai i çështjeve të bashkëpunimit ndërkombëtar në trafikun e drogës”, shtoi ai.
Simoni bënë me dije se ka propozuar ngritjen e një gjykate të posaçme e cila duhet të merret vetëm me shqyrtimin e trafikut ndërkombëtar të drogës, nisur dhe nga numri i lartë i çështjeve në gjykim. /b.d
