Me një sulm të paprecedentë në territorin e Katarit, që duket se është autorizuar nga Presidenti Donald Trump, shteti hebre përpiqet të eliminojë të gjithë udhëheqjen e Hamasit. Operacioni, i organizuar nga forcat e armatosura izraelite dhe nga Shin Bet, shërbimi i inteligjencës së brendshme, është pagëzuar me emrin “Atzeret HaDin”, (Samiti i Zjarrit) dhe ka përfshirë avionë luftarakë që kanë fluturuar 1.800 kilometra nga Izraeli në Doha.
Në orët e pasdites, në kryeqytetin e Katarit janë dëgjuar shpërthime në disa pjesë të qytetit.
“Një sulm i ulët i kryer nga Izraeli ka goditur ndërtesa banimi ku strehohen disa anëtarë të zyrës politike të Hamasit”, deklaroi Majed al-Ansari, zëdhënësi i Ministrisë së Jashtme të Katarit.
Kush e udhëheq Hamasin?
Pas vrasjes së Yahya Sinwar në tetor 2024, Hamasi nuk ka emëruar zyrtarisht një lider suprem të ri: drejtimi është besuar një drejtorati prej pesë anëtarësh, të përbërë nga Muhammad Darwish, Khalil al-Hayya, Khaled Meshaal, Zael Jabbarin dhe Nizar Awadallah. Midis tyre, Darwish duket se ka fituar një rol më të lartë, të paktën përfaqësues institucional, siç dëshmon vizita e fundit e grupit në Iran: Darwish ishte i pari që përshëndeti ajatollahun Ali Khamenei.
Forcat e armatosura izraelite kanë konfirmuar zyrtarisht operacionin.
“Për vite me radhë, këta anëtarë të Hamasit kanë udhëhequr operacionet e organizatës terroriste, janë përgjegjës për masakrën e 7 tetorit dhe kanë orkestruar luftën kundër Izraelit”, thuhet në deklaratë.
Kush ishte në shënjestër të sulmit?
Informacionet janë ende të pakta dhe të pavërtetuara. Televizionet saudite raportojnë për katër vrasje mes “zyrtarëve të lartë” të lëvizjes islamiste palestineze, por Hamasi, për momentin, mohon vdekjen e udhëheqësve të tij. Mediat e Katarit dhe ato saudite bien dakord se Khalil al-Hayya ishte mes objektivave.
Anëtar i lartë i Zyrës Politike të Hamasit, që nga fillimi i luftës në Gaza ai ka udhëhequr ekipin negociator në Doha dhe mbetet përgjegjës politik për Rripin e Gazës. Pikërisht përmes tij u bë e ditur se Hamasi, tre javë më parë, kishte pranuar “pa kushte” propozimin për armëpushim të paraqitur nga Katari dhe Egjipti. I lindur në Gaza në vitin 1960, ai konsiderohet si një nga njerëzit më të afërt me Sinwarin, ideatorin e sulmit të 7 tetorit.
Sipas një gazetari të AFP-së në Doha, shpërthimet ndodhën brenda një kompleksi që strehon Hamasin.
Ka raportime se sulmi ndodhi teksa po zhvillohej një takim i nivelit të lartë të Hamasit për të përcaktuar pozicionin e grupit ndaj negociatave me Izraelin, dhe pikërisht ky “Samit i Zjarrit” i ka dhënë emrin operacionit.
Para se IDF të konfirmonte sulmin, televizioni irakian Sabrin News raportoi se objektivi ishte selia qendrore e Hamasit në Doha. Në takim thuhet se morën pjesë al-Hayya, Meshaal, Darwish, Razi Hamad dhe Izzat al-Rishq.
Kanali saudit Al Arabiya pretendon se al-Hayya është vrarë, pasi në shënjestër ka qenë zyra e tij. Al Hadath, një tjetër kanal saudit, shton se edhe Zael Jabareen (përgjegjës për Hamasin në Bregun Perëndimor), Khaled Meshaal (i lindur në Silwad në Bregun Perëndimor në vitin 1956, ka udhëhequr Hamasin nga 1996 deri në 2017) dhe Nizar Awadallah (anëtar i politbyrosë, ishte një nga të besuarit e sheikut Yassin, themeluesit të Hamasit) mund të jenë vrarë.
Megjithatë, siç u tha, Hamasi për momentin mohon këto lajme.
