Presidenti francez Emmanuel Macron, Kryeministri britanik Keir Starmer, Kryeministrja italiane Giorgia Meloni dhe Kancelari gjerman Friedrich Merz, kanë dalë në një konferencë të përbashkët për mediat pas përfundimit të samitit të Parisit, mbi situatën në Ngushticën e Hormuzit.
Starmer bëri të ditur se Britania e Madhe dhe Franca do të udhëheqin një mision ndërkombëtar për të garantuar lundrimin e lirë në Ngushticën e Hormuzit.
Ai njoftoi se misioni do të marrë formë javën e ardhshme, ndërsa në Londër do të zhvillohet një tjetër takim ku do të përcaktohet përbërja e tij.
Sipas Starmer, disa vende kanë ofruar tashmë mjete dhe mbështetje për këtë operacion. “Rihapja e Hormuzit është një domosdoshmëri dhe një përgjegjësi globale”, u shpreh ai, por shtoi se nevojitet një zgjidhje e qëndrueshme dhe funksionale afatgjatë.
Presidenti Macron e nisi fjalën e tij duke theksuar pasojat shumë të rënda që mbyllja e Ngushticës së Hormuzit ka pasur për gjithë planetin dhe ekonominë globale.
Ai u shpreh se mirëpret zhvillimet e fundit, përfshirë armëpushimin mes Iranit dhe SHBA-së, armëpushimin në Liban, i cili sipas tij duhet të respektohet plotësisht, si dhe rihapjen e ngushticës.
Macron deklaroi se vendet pjesëmarrëse kërkojnë rihapjen e plotë, të menjëhershme dhe pa kushte të Ngushticës së Hormuzit nga të gjitha palët, rikthimin e kushteve të lëvizjes së lirë si para luftës, si dhe kundërshtojnë çdo përpjekje për privatizimin e ngushticës apo vendosjen e tarifave kalimi.
