Gazeta britanike “The Times” e krahasonte me seritë triller të ‘Game of Thrones’ zgjedhjen e kreut më të lartë të NATO-s, duke aluduar se dalja nga BE e Britanisë së Madhe do të penalizonte favoritin kryesor për këtë detyrë, Mareshallin anglez Sir Stuart Peach.
Skena e këtij filmi real që po luhej brenda aleancës më të fuqishme ushtarake në planet, ku bën pjesë dhe Shqipëria, luhej pikërisht në Tiranë, këtë fundjavë, gjatë samitit të NATO-s.
“Shanset e shefit ushtarak të Britanisë që të sigurojë një punë të lartë në NATO janë në dyshim me frikën se aleatët europianë mund të kërkojnë të ndëshkojnë Britaninë e Madhe për shkak të Brexit duke mos zgjedhur atë”, shkruante kjo gazetë duke cituar burime nga forcat ushtarake britanike.
Por, në fakt parashikimi i “The Times” nuk doli dhe pas votimit nga shtetet anëtare Peach do të jetë kryetari i ri i komitetit ushtarak në NATO.
Megjithatë tentativën e vendeve anëtare të BE-së për bllokimin e zgjedhjes së tij në krye të NATO-s e arikulojnë media të tjera angleze një ditë pas zgjedhjes.
Express shkruan se “Peach ishte “tërbuar” pasi kishte informacione se ministrat e BE-së u kishin kërkuar gjeneralëve dhe admiralëve të tyre që të mos votojnë për një “britanik” gjatë procesit të daljes së Britanisë së Madhe nga BE”.
Burime ushtarake të cituara nga Express bëjnë të ditur se vota e kësaj fundjave u nda në një betejë mes “Europës së vjetër” dhe “Europës së re”, me vendet baltike dhe Poloninë që kundërshtuan aspiratat e Brukselit.
Ish-shefi i shtabit të përgjithshëm të mbrojtjes, Lord Dannatt, konfirmoi se votimi vendimtar ishte në rrezik nga votat “mendje-ngushta”.
“Ky është pozicioni më i lartë ushtarak i NATO-s, megjithatë, është shumë politik”, tha ai.
“Mjerisht, ekzistojnë disa mendje të vogla që do të donin t’ia “grabisnin” Britanisë këtë post dhe e shohin këtë si një mundësi për të shënuar pikë. Megjithëse nuk kemi informacion zyrtar për ndarjen e votimit, unë mendoj se ishte një ndarje midis Evropës së vjetër – Francës, Gjermanisë, Spanjës dhe ndoshta Italia – dhe Europa e re e shteteve të Balltikut dhe Polonisë, të cilët e mbështesin kandidaturën britanike”.
Dannatt tha pas votimit se “Peach është njeriu i duhur për këtë punë dhe do të të do të tregojë angazhimin e vazhdueshëm të Britanisë ndaj mbrojtjes dhe sigurisë evropiane pas Brexit “.
“Ndërsa emërimi i Sir Stuart është testament i aftësive dhe arritjeve të tij, ajo është gjithashtu një demonstrim i rolit udhëheqës që luan Mbretëria e Bashkuar në NATO dhe rëndësia e Aleancës për Mbretërinë e Bashkuar”- shtoi ai.
Emërimi i britanikut vjen vetëm disa ditë pasi Jean-Claude Juncker paraqiti vizionin e tij për një Ushtri Europiane.
Të mërkurën kreu i Komisionit Evropian deklaroi: “Bashkëpunimi i strukturuar i vazhdueshëm në fushën e mbrojtjes është në rrugë të mbarë”. .
Detyra që mori britaniku në NATO nënkupton se ai është këshilltari kryesor ushtarak i Sekretarit të Përgjithshëm Jens Stoltenberg, duke e bërë atë oficerin më me influencë të NATO-s pas komandantit të Forcave Aleate, një post i mbajtur gjithmonë nga një amerikan.
Deputeti Crispin Blunt, ish-kryetar i komitetit të çështjeve të jashtme u shpreh se “Britania është fuqia më e madhe e mbrojtjes në Evropë dhe ne kemi një interes të vërtetë për mbrojtjen evropiane, gjë që nuk do të ndryshojë as pas Brexit.”
Nuk dihet se në cilën anë votoi Shqipëria, po gjitha gjasat janë që vota të ketë shkuar për gjeneralin britanik. Para votimit Peach takoi presidentin Ilir Meta dhe ndoqën bashkë një stërvitje të forcave të NATO-s./Tesheshi.com/a.m.
