Përfundimi i luftës në Lindjen e Mesme mund të jetë çështje javësh, ka thënë sekretari amerikan i shtetit, Marco Rubio. Nga Franca, ku mori pjesë në samitin e ministrave të G7-ës, sekretari amerikan i shtetit tha se SHBA-të ishin shumë afër arritjes së objektivave në Iran.
“Shtetet e Bashkuara kanë objektiva shumë të qarta dhe ne jemi shumë të bindur se jemi në prag të arritjes së tyre, shumë shpejt. Po flasim për javë, jo për muaj”, tha Rubio.
Ministrat e jashtëm të G7 dolën me një deklaratë të përbashkët për rëndësinë e minimizimit të ndikimit të konfliktit te partnerët rajonalë, popullatat civile dhe infrastrukturën kritike. Ata përsëritën gjithashtu nevojën për të rivendosur lirinë e lundrimit të sigurt dhe pa pagesë në Ngushticën e Hormuzit. Në diskutime u ngrit shqetësimi i lidhjeve mes Rusisë dhe Iranit.
“Shohim që Rusia po e ndihmon Iranin me inteligjencë për të shënjestruar amerikanët, për të vrarë amerikanë. Rusia po e mbështet Iranin tani edhe me dronë, në mënyrë që ata të mund të sulmojnë vendet fqinje dhe gjithashtu bazat ushtarake amerikane. Pra, këto luftëra janë shumë të ndërlidhura. Nëse Amerika dëshiron që lufta në Lindjen e Mesme të ndalet, ata duhet të ushtrojnë presion mbi Rusinë në mënyrë që ajo të mos jetë në gjendje t’i ndihmojë.”, u shpreh Kaja Kallas, shefja e politikës së jashtme të BE-së.
Në një muaj konflikt në Lindjen e Mesme, aleatët europianë të SHBA-së kanë bërë thirrje për zgjidhje diplomatike dhe kanë refuzuar të përfshihen drejtpërdrejt në luftë, pavarësisht presionit nga presidenti Donald Trump.
