Ish-deputeti i Partisë Demokratike, Ervin Salianji, ka nisur takimin me demokratët në Fier, ku i është rezervuar një pritje entuziaste.
Gjatë takimit, Salianji sulmoi kupolën drejtuese të PD-së, duke thënë se ata gënjejnë demokratët me premtime se do e sjellin opozitën në pushtet.
Salianji tha gjithashtu se kupola drejtuese e PD-së nuk i ka bërë mirë llogaritë, pasi sipas tij, ai nuk ka hyrë në politikë që të heshtë, por që të flasë të vërtetën.
“E keni parë arsimin? Sesi ka beton, bëhen gjasme shkolla, por shërbimi arsimor është mizerje. Drejtoritë arsimore janë bërë si organizata partie dhe i kanë kthyer mësuesit e Shqipërisë thuajse si roje dhe administratorë. Ky është standardi i edukimit të Edi Ramës. Këta edhe fondet e BE-së tentojnë t’i vjedhin. Ka fasada dhe vjedhje kudo, ndërkohë që Shqipëria boshatiset dhe plaket. Kundërshtarin nuk e zgjedhim dot ne, ai është Edi Rama dhe do të përmbyset në kutinë e votimit.
Duhet përmbysur duke frymëzuar njerëz. Të gjithë të tjerat janë ëndrra në sirtar që i kemi parë tash e 13 vite me radhë. Jemi këtu në Fier për të hapur një shteg shprese, për të hapur një kapitull të ri për PD-në dhe Shqipërinë. Demokratët dinë të presin e durojnë, por kanë duruar boll. 13 vite në opozitë dhe 13 vite që përsëriten të njëjtat përralla. Dua ta them qartë se disa prej lidershipit nuk i kanë bërë mirë llogaritë, sepse unë nuk kam ardhur në politikë për të heshtur, por për të folur të vërtetën”, tha mes të tjerash Salianji.
