Anëtari i Kryesisë së Partisë Demokratike, Ervin Salianji, ka folur hapur lidhur me situatën e brendshme në kampin blu, duke lëshuar kritika ndaj drejtuesve për mungesë reflektimi pas zgjedhjeve të 11 majit.
I ftuar në emisionin “3D” të Alban Dudushit në RTSH, Salianji komentoi turin e tij të fundit të takimeve në bazë (Durrës dhe Gjirokastër), duke e cilësuar atë si një lëvizje të domosdoshme për të “rizgjuar” partinë nga letargjia.
Salianji theksoi se lëvizja e tij nuk bëhet me harta të paracaktuara, por diktohet nga shqetësimet e bazës demokrate. Sipas tij, premtimi për analizën e zgjedhjeve u vonua.
“U tha që pas zgjedhjeve të 11 majit do të ketë analizë dhe ajo u zvarrit. Lëvizja jonë është paqtuese, i jep energji PD-së dhe e bën konkurruese. Ajo ngacmon shurdhërinë e drejtuesve të PD-së që nuk kanë dashur të dëgjojnë,” deklaroi Salianji.
Ai shtoi se qëllimi është rikthimi i meritokracisë dhe karrierës në parti, duke nënvizuar se takimet e tij nuk janë “private”, por politike në shërbim të demokratëve.
Raporti me Berishën
I pyetur nëse takimet e tij krijojnë dualitet me kreun e PD-së, Sali Berisha, deputeti demokrat e mohoi një gjë të tillë, por theksoi se çdo drejtues e ka për detyrë të jetë aty ku janë problemet.
“Nuk mendoj se ka dualitet mes meje dhe Berishës. Unë jam përfaqësues i PD. Nëse edhe privatisht mbledh mijëra demokratë, kjo i bën mirë PD-së,” u shpreh ai.
Avokati i Popullit
Një pjesë të rëndësishme të kritikës, Salianji e fokusoi te strategjia parlamentare e PD-së, duke marrë si shembull procesin për zgjedhjen e Avokatit të Popullit.
Ai e quajti “gabim të rëndë” propozimin e 15 emrave pa një direktivë të qartë politike.
“Duhej të shkohej me një emër. Është një gabim i rëndë, pasi i jep mundësi shumicës të bëjë ato që bën. PD-së i heq pikë çdo ulje me Ramën nëse ai nuk firmos përpara çështjet që PD shtron. S’mund të themi përherë që na e hodhi Edi Rama,” tha Salianji.
