Pas shtatë muajsh shtyrjesh dhe përpjekjesh për të rrëzuar provat, GJKKO vendos të çojë për gjykim çështjen ndaj ish-kryeministrit Sali Berisha, dhëndrit të tij dhe bashkëpandehurve, të akuzuar për privatizim të parregullt dhe zhvillim ndërtimor mbi truallin e ish-kompleksit sportiv “Partizani”.
Nga Sabina Nika
Pas shtatë muajsh shtyrjesh dhe debatesh ligjore, çështja penale e njohur si “Dosja Partizani” ka kaluar zyrtarisht për gjykim më 19 maj në Gjykatën e Posaçme Kundër Korrupsionit dhe Krimit të Organizuar (GJKKO). Vendimi u dha pas një seance paraprake të tensionuar, ku mbrojtja e ish-kryeministrit Sali Berisha dhe bashkëpandehurve kërkoi përsëri rrëzimin e provave dhe përjashtimin e gjyqtares, kërkesa këto të cilat u refuzuan nga trupa gjyqësore.
Ky vendim i hap rrugën vazhdimit të procedurës penale ndaj Berishës, dhëndrit të tij Jamarbër Malltezit, dhe bashkëpandehurve të tjerë, të cilët akuzohen për “korrupsion pasiv i kryer në bashkëpunim”, që lidhen me privatizimin dhe më pas ndërtimin e 17 pallateve në ish-kompleksin sportiv Partizani, një aferë që SPAK pretendon se i ka sjellë përfitime mbi 5 milionë euro dhëndrit të ish-kryeministrit.
Shtyrjet dhe manovrat ligjore që vonuan procesin
Procesi gjyqësor për dosjen e njohur si “Dosja Partizani” ka kaluar në një periudhë të gjatë dhe me shumë shtyrje, duke ngadalësuar kështu zhvillimin e çështjes ndaj ish-kryeministrit Sali Berisha, dhëndrit të tij Jamarbër Malltezi dhe bashkëpandehurve të tjerë.
Seancat paraprake në Gjykatën e Posaçme Kundër Korrupsionit dhe Krimit të Organizuar (GJKKO) janë shtyrë disa herë, kryesisht për mungesë avokati, shqyrtimin e vlefshmërisë së provave dhe kërkesave të mbrojtjes për përjashtimin e gjyqtarëve.
Mbrojtja e Berishës, e cila ka cilësuar akuzat si sulm politik, ka bërë përpjekje të përsëritura për të rrëzuar provat dhe përjashtuar gjyqtarët nga procesi.
Në prill 2024, pas rrëzimit të kërkesës për shpalljen e pavlefshmërisë së provave, avokati i Berishës, Genc Gjokutaj, kërkoi përjashtimin e gjyqtares së seancës paraprake Flojera Davidhi, duke shtyrë sërish procesin deri më 5 maj.
Më pas, mbrojtja ngriti akuza të rënda ndaj gjyqtares së hetimit paraprak Irena Gjoka, duke pretenduar se ajo kishte një dënim në Greqi për falsifikim dokumentesh, një pretendim që u përdor për të kërkuar rivlerësimin e vendimeve për provat.
“Kërkuam përjashtimin e gjyqtares, pasi në këtë proces po shkelet Kushtetuta dhe Kodi i Procedurës Penale. Vendimet janë të paekzekutuara, ndërkohë që gjykata dhe prokuroria flasin si të ishin të zbatueshme. Kjo është një sfidë e hapur ndaj drejtësisë.” – deklaroi avokati Genc Gjokutaj.
Në seancën e 19 majit, gjyqtarja Flojera Davidhi rrëzoi kërkesën e fundit të mbrojtjes për shtyrje dhe pavlefshmëri të vendimeve, duke i dhënë kështu fund periudhës së shtyrjeve dhe duke kaluar çështjen për gjykim.
Berisha dhe Malltezi vazhdojnë të mohojnë çdo përfshirje në korrupsion dhe e konsiderojnë këtë proces një përpjekje për të goditur opozitën politike në Shqipëri.
Prokuroria e Posaçme kundër Korrupsionit dhe Krimit të Organizuar pretendon se Berisha, gjatë kohës kur ishte kryeministër, përdori pozicionin e tij për të ndryshuar ligje në favor të dhëndrit të tij, Malltezit, dhe për të vënë në shërbim institucionet shtetërore në këtë aferë korruptive.
Sali Berisha, sot 81 vjeç, është zyrtari më i lartë në tre dekada që përballet me akuza të tilla. Në tetor 2023, SPAK vendosi ndaj tij masën e “detyrimit për paraqitje” dhe “bllokimit të pasaportës”, duke e ndaluar që të dalë jashtë vendit. Një vit më parë, i njëjti organ arrestoi dhëndrin e tij, Jamarbër Malltezin, i cili më pas kaloi nga arresti në burg në “arrest shtëpie”.
Berisha i ka mohuar fuqishëm akuzat, duke i cilësuar ato si hakmarrje politike dhe një sulm direkt ndaj opozitës shqiptare, i orkestruar nga kryeministri aktual Edi Rama dhe mbështetur sipas tij nga faktorë të jashtëm, përfshirë multimiliarderin Xhorxh Soros.
Në një nga seancat paraprake, Berisha pretendoi se procesi kundër tij po zhvillohet në shkelje të Kushtetutës dhe të drejtave të tij.
Në dosjen e SPAK thuhet se privatizimi i ish-kompleksit Partizani u bë në kushte të dyshimta, me përfshirjen e zyrtarëve të lartë të shtetit dhe një grupi biznesmenësh, përfshirë dhëndrin Malltezi dhe ndërtuesin Fatmir Bektashi. (Shteg.org)
