Salah Abdeslam donte të hidhte veten në erë brenda Stade de France në Paris, gjatë kohës që zhvillohej ndeshja miqësore midis Francës e Gjermanisë, më 13 nëntor 2015, por më pas ndërroi mendje.
Këtë e ka deklaruar dje para hetuesve belgë terroristi i plagosur, i arrestuar në Bruksel pas 127 ditësh në arrati.
“Këto deklarata të para duhen marrë me kujdes, lënë pezull një seri pyetjesh që Salah Abdeslam duhet t’u japë përgjigje”, tha prokurori i Parisit, François Molins, i cili e përshkroi Abdeslamin si “aktor kyç” në sulmet xhihadiste, sepse “ka pasur një rol kryesor në formacionin e komandos”, ku mbulonte pjesën logjistike.
Abdeslam gjendet në burgun e Bryzhit, 80 kilometra larg Brukselit, ndërtuar më 2008 posaçërisht për persona me rrezikshmëri të lartë, ndërkohë që aty ka edhe mundësinë e ndihmës mjekësore, pasi është i plagosur në këmbë.
Avokati mbrojtës i tij ka kundërshtuar ekstradimin në Francë.
“Boll iu gjunjëzuam Francës pas atentateve”, tha Sven Mary, një nga avokatët më të mirë të Belgjikës.
“Refuzimi i personit të përfshirë për t’iu dorëzuar autoriteteve nuk përbën pengesë për dorëzimin e tij”, përgjigjet ministri francez i drejtësisë.
Ndërkaq, edhe pse Salah u arrestua, në Francë nuk konsiderohet si sukses i madh nga disa politikanë, sidomos nga opozita, e cila e sheh si absurd faktin që për katër muaj ai qëndronte në Belgjikë e ndoshta në Molenbeek, ku u kap e ku ka shtëpinë.
“Ose Salah Abdeslam ishte shumë dinak, ose shërbimet belge janë të paafta”.
Vetë familjarët e të arrestuarit kanë bërë të ditur se ndihen më të lehtësuar, pasi tashmë gjuetia përfundoi. Është e kuptueshme, për shkak të presionit të madh në të cilin janë gjendur katër muajt e fundit.
Salah Abdeslam para hetuesve: Doja ta shpërtheja bombën në stadium
TË FUNDIT
