Saimir Pirgu është në majat e karrierës si tenor me sukses ndërkombëtar.
Për turin e tij ‘Il Mio Canto’, ai është ngjitur në skenat më ‘të frikshme’ për këngëtarët e megjithatë, interpretimi i tenorit shqiptar i ka vënë njerëzit në radhë për të marrë autografin e tij. Por a do të thotë të adhurohesh nga qindra njerëz, dashamirës a njohës të muzikës klasike, se i ke të gjitha?
‘Jeta e një artisti mund të duket e bukur, plot sukses, vëmendje, makina e udhëtime, por ka diçka që e karakteriozon atë: Vetmia. Një artist është i vetmuar’
Kështu ka rrëfyer Saimir Pirgu për Ardit Gjebrean tek ‘E Diela Shqiptare’. Tenori shqiptar që po njeh majat e suksesit ndërkombëtar tregoi se jeton vetëm, i shoqëruar nga vetëm një valixhe. ‘Nga njëri koncert në tjetrin’, u shpreh ai, ‘Unë fle vetëm në hotel në fund të ditës. Megjithatë, jo gjithmonë’, ka thënë ai duke qeshur.
Pirgu është ende në vijim të turit botëror për albumin ‘Il Mio Canto’, dhe së fundmi është ndalur në Tiranë, në Teatrin e Operas dhe Baletit. Ndërkaq, në 2 mijë kinema nëpër botë shfaqet opera ‘La Traviata’, ku Pirgu protagonizon Alfredon. Në Kioi Concert Hall të Tokios, njerëzit kanë pritur 4 orë në radhë për autografin e tij. Por si mund të përballohen të gjitha këto, aq më tepër kur të duhet të interpretosh rolet më të vështira të historisë së operas, në sallat më gjigande?
‘Duhet shumë egoizëm për të përballuar interpretimin e 3 orë e gjysmëm partiturash në skenë. është stres shumë i madh, vetëm një njeri me ego shumë të madhe mund t’ia dalë’
Saimir Pirgu gjithashtu tregoi se cilat prej skenave më të mëdha të botës për koncertet operistike e emociononin më shumë: ‘Teatri ku ndjej qetësi është Royal Opera House i Londrës. Eshtë një skenë që të bën të ndihesh vërtet artist’ Megjithatë, lidhjen shpirtërore më të natyrshme e ndiente me publikun e Vienës, ku tha se ia kalonte shkëlqyeshëm. Nga ana tjetër, teatri që e bënte të ndiente më tepër stres, ishte La Scala i famshëm i Milanos: ‘është skena më e sikletshme’, rrëfeu ai, ‘italianët kanë artin dhe shijet e tyre. E kanë të vështirë ta përqafojnë një mënyrë interpretimi, pasi kanë pritshmëri perfeksioniste’
Në fund, ai ndau edhe gëzimin që si pjesë e turit të tij botëror, mundi të ishte edhe një koncert në Tiranë: ‘U vendos në momentin e fundit, por ndihem shumë i lumtur që munda të këndoj edhe në Teatrin e Operas dhe të Baletit’. Turi ‘Il Mio Canto’ (Kënga Ime) do të vijojë edhe në disa prej teatrove më prestigjiozë në botë, si Teatri i Operas në Vienë, ai i Berlinit, Theatre du Chatelet në Paris si edhe në Kaufman Center, Merkin Concert Hall në New York.
