Ish-kryebashkiaku i Kukësit, Safet Gjici i vënë nën akuzë për “Korrupsion pasiv i funksionarëve të lartë shtetërorë ose i të zgjedhurve vendor” pritet të dalë të hënën përpara Gjykatës së Posaçme, aty ku do t’i komunikohet dhe masa e sigurisë.
Aktualisht ish-kryetari i bashkisë po mbahet në qelitë e bllokut të sigurisë, aty ku u dërgua mbrëmjen e së shtunës fill pas arrestimit nga policia.
Përfaqësuesit ligjorë të Safet Gjicit jashtë kamerave thonë se akuza e ngritur nga Prokuroria e Posaçme nuk qëndron dhe se vendimi i marrë në mungesë do ankimohet. Po të hënën pritet t’i komunikohet masa edhe shtetases Alma Kaçi, të cilën gjykata e la në “arrest në shtëpi”.
Hetimet për Safet Gjicin nisën disa ditë më parë pas publikimit në rrjetet sociale të një video me përmbajtje erotike, ku ish-kryebashkiaku kryente marrëdhënie intime me shtetasen, Alma Kaçi.
Pas aktit seksual, ata diskutojnë në zyrë për një projekt që do të financohej nga Bashkia për izolimin e qenëve endacakë në Kukës. Menjëherë më pas, Gjici thërret në zyrë një nga vartësinë e tij që të merret me dokumentacionin që do dorëzojë shtetasja, Alma Kaçi.
Të gjitha këto veprime të kryera në harkun kohor të pak minutave, sipas SPAK kanë ngritur dyshimet se ish-kryebashkiaku dhe gruaja në video kanë konsumuar veprën penale të korrupsionit.
