Mesfushori i Skënderbeut, Sabien Lilaj, është shpallur lojtari më i mirë në Shqipëri për vitin 2015. “Topi i Artë” i është dhënë nga presidenti Armand Duka, në Asamblenë e përgjithshme të zakonshme të FSHF-së. Veç lojtarit të kampionëve dhe të kombëtares, janë shpërndarë edhe disa çmime të tjera, për për lojtarë që nuk janë më në aktivitet.
Ish-portieri i Partizanit dhe kombëtares në vitet ‘60, Mikel Janku, është nderuar me titullin “Nderi i futbollit shqiptar”, ashtu si dhe Sokol Kushta, ish-sulmues i Flamurtarit, Partizanit dhe kombëtares. Partneri i Kushtës në sulmin e Partizanit të viteve ’80, Ylli Shehu, është nderuar me titullin “Legjenda e futbollit shqiptar”, titull që e ka marrë edhe një tjetër lojtar i jashtëzakonshëm sulmues i së njëjtës periudhë, Shkëlqim Muça.
Për Andrea Markon dhe Krenar Alimehmetin është dhënë “Titulli i mirënjohjes”.
Çmim ka marrë edhe një i huaj, pikërisht italiani Gianni De Biasi, trajneri i Shqipërisë finaliste të europianit. Për De Biasin dhe ish-sulmuesin Refik Resmja, pas vdekjes, u dha çmimi “Nderi i kombit në futboll”.
Ndërkaq, presidenti Duka bëri thirrje që të mos hidhet baltë mbi sukseset, për të mos dëmtuar imazhin e futbollit shqiptar. Ai vlerësoi si arritje ndërtimin e stadiumit të Elbasanit, nisjen e punimeve në Shkodër dhe së shpejti edhe në për Arenën Kombëtare në Tiranë.
“Por, më e rëndësishme është beteja jonë kundër trukimeve. Në krahasim me një vit më parë, dyshimet për trukime janë 100 herë më të vogla”, tha Duka.
Asambleja votoi për mandatin dyvjeçar të Komisionit të Etikës, duke rikonfirmuar anëtarët e mëparshëm Fatmir Braka, Bejkush Birçe, Ardian Leka dhe Bashkim Koka, ndërsa u zgjodh si anëtar i ri Agron Kuliçaj.
JavaNews / Dritan Ikonomi
