Arrestimi i Ilir Metës ka qenë tema e diskutimit në të gjithë opinionin publik në 24 orët e fundit. Akuzat e SPAK janë tre pastrim parash, korrupsion dhe fshehje të pasurisë.
Por sa vite burg do të rrezikonte ish-Presidenti, ish-kryeministri dhe ish-kryetari i Kuvendit nëse do të shpallej fajtor.
I ftuar në studion e “Quo Vadis” të moderatores Pranvera Borakaj në Vizion Plus, ish-Prokurori Besnik Muçi tha se është ende shpejt për të folur për dënimin.
Sipas tij fillimisht SPAK do të duhet të provojë akuzat, pasi është shumë i vështirë ky lloj hetimi.
Pjesë nga Biseda:
Borakaj: Sa vite mund të dënohet?
Muçi: Ngjarja e djeshme të gjithëve na vë në një moment refleksioni. Akuzat të cilat i atribuohen, pasi ato janë vepra penale që dyshohet se i ka kryer, korrupsion pasiv dhe aktiv, pastrim parash është vepër e rëndë penale nga 5 në 15 vjet. Janë vepra jo shumë të rënda, por dhe jo të lehta. Sa mund të dënohet kush jurist e ka parasysh. Por shumë thjeshtë për të folur. Por unë shoh që janë vepra të lidhura me detyrën. Janë vepra shumë të vështira për tu hetuar, sfidë shumë e vështirë e prokurorisë. Pavarësisht se si etiketohet zoti Meta përsëri ai ka qenë kryeministër, President, kryetar parlamenti. Them sfidë pasi janë vepra që edhe duhen hetuar, nëse ka veprim apo mos veprim, dhe pjesa e përfitimit. Me aq sa pamë sot ka disa elementë që ngrenë dyshime serioze.
Borakaj: Përshembull?
Muçi: Në funksionin e ministrit apo kryetarit të Kuvendit të kesh ndikuar në një ligj.
Borakaj: Ose ke detyruar deputetin?
Muçi: S’mund të themi ka detyruar deputetin. Por nuk janë të lehta për tu provuar si vepra penale.
