Nga Eduard Zaloshnja
Sonte në darkë, në fund të votimit, KQZ-ja do të njoftojë pjesëmarrjen në 6 bashkitë e zgjedhjeve të pjesshme. Dhe fill pas këtij njoftimi, me gjasa, do të fillojnë diskutimet në studiot televizive mbi nivelin e ulët të pjesëmarrjes në votim. Përsëri me gjasa, pakkush do të vërë në dukje faktin se shumica dërrmuese e atyre zgjedhësve që nuk marrin pjesë në votim, në fakt, nuk e kanë mundësinë praktike të votojnë (sepse janë në emigracion të përhershëm apo të përkohshëm).
Teksa nuk mund të dimë me saktësi se sa dhe si do të votojnë nesër banorët e 6 bashkive, shifrat e votimit të vjetshëm (të 25 prillit) mund të na japin një pikë referimi.
Kështu, në Bashkinë Durrës, 42.5% e zgjedhësve të listës së 25 prillit të vjetshëm votuan, ndërsa rreth 45% të tjerë ishin jashtë Shqipërisë ditën e zgjedhjeve. Në Bashkinë Shkodër, 41.5% e zgjedhësve të listës së 25 prillit të vjetshëm votuan, ndërsa rreth 49% të tjerë ishin jashtë Shqipërisë ditën e zgjedhjeve. E kështu me rradhë…
Pra, në qoftë se pjesëmarrja zyrtare i afrohet nesër përqindjeve të 25 prillit të vjetshëm, mund të thuhet se zgjedhësit e 6 bashkive të mbetur në Shqipëri kanë marrë pjesë masivisht në votimin. (Në tabelën 1, jepen përqindjet e pjesëmarrësve, mospjesmarrësve dhe atyre që ishin jashtë Shqipërisë më 25 prill 2021.)
| Tabela 1. Pjesëmarrja më 25 prill 2021 | ||||
| Bashkitë | Pjesëmarrës | Mospjesmarrës | Jashtë Shqipërisë* | TOTAL |
| Durrës | 42.5% | 12.5% | 45% | 100% |
| Shkodër | 41.5% | 9.5% | 49% | 100% |
| Lushnje | 47.0% | 11.0% | 42% | 100% |
| Dibër | 53.0% | 11.0% | 36% | 100% |
| Vorë | 55.0% | 10.0% | 35% | 100% |
| Rrogozhinë | 34.8% | 13.2% | 52% | 100% |
* Përqindje e përafërt, bazuar në të dhënat e INSTAT-it
Dhe si u ndanë votat e pjesmarrësve në votimin e 25 prillit të vjetëshëm në 6 bashkitë? Përgjigjia është përmbledhur në Tabelën 2.
| Tabela 2. Ndarja e votave më 25 prill 2021 | |||||
| Bashkite | PS+PSD | P. e tjera | PS+PSD* | P. e tjera* | Gjithsej |
| Durres | 50.6% | 49.4% | 55,600 | 54,300 | 109,900 |
| Shkoder | 43.4% | 56.6% | 30,100 | 39,300 | 69,400 |
| Lushnje | 54.2% | 45.8% | 26,600 | 22,400 | 49,000 |
| Diber | 41.4% | 58.6% | 12,400 | 17,600 | 30,000 |
| Vore | 56.3% | 43.7% | 9,300 | 7,200 | 16,500 |
| Rrogozhine | 54.8% | 45.2% | 6,100 | 5,000 | 11,100 |
| 6 Bashkitë | 49.0% | 51.0% | 140,000 | 146,000 | 286,000 |
*Votat që u plotësuan gabim më 25 prill u janë shtuar votave të vlefshme të partive, duke presupozuar shpërndarje gabimi proporcional të fletëve të pavlefshme.
