Prokurori Ardian Braho ka mohur akuzat lidhur me video-skandalin ku në emër të tij, oficeri Fatos Lushi i mori një qytetari 18 mijë euro ryshfet.
“Nuk kam asnjë lidhje me 18 mijë eurot e marra nga oficeri Fatos Lushi në videon e publikuar në media. Oficeri ka përdorur emrin tim pa dijeninë time dhe për këtë arsye kërkoj të hetohet gjithçka, të dalë e vërteta dhe të mbajë përgjegjësi sipas ligjeve në fuqi çdokush që është implikuar”.
Me këto fjalë u është drejtuar kolegëve të tij të Krimeve të Rënda prokurori i pezulluar nga detyra, Ardian Braho, raporton “Panorama”.
Ai është marrë në pyetje në një seancë maratonë te Krimet e Rënda në lidhje me videon, ku oficeri Fatos Lushi merr 18 mijë euro nga një biznesmen. Mbrëmjen e së mërkurës, menjëherë pas publikimit të videos në emisionin stop në TV Klan, Prokuroria e Krimeve të Rënda filloi hetimet për veprën penale të “korrupsionit pasiv të gjyqtarëve, prokurorëve dhe funksionarëve të tjerë të Drejtësisë”.
Dy oficerë të hetimit të Krimeve të Rënda shkuan në zyrën e Ardian Brahos e Fatos Lushit në Prokurorinë e Tiranës, dhe sekuestruan dokumentet që gjetën aty në lidhje me dosjen e 150 mijë eurove të sekuestruara shtetasit Gani Manollari.
Pas këtij hetimi të nisur, rreth mesnatës, prokurori Ardian Braho është paraqitur vullnetarisht te Krimet e Rënda ku ka punuar edhe vetë disa vite më parë. Ai ka deklaruar se ishte në dispozicion të hetimit, i gatshëm për të dhënë shpjegime në lidhje me videon e bërë publike.
Ajo çka ka ndodhur më pas është mbajtur sekret, por mësohet se pas paraqitjes në Prokurori, Braho ka dhënë shpjegime deri pas mesnatës të së mërkurë për të vazhduar ditën e djeshme që në orët e mëngjesit.
Prokurorët Klodian Braho dhe Manjola Kajana kanë mbajtur “në izolim” kolegun e tyre deri dje rreth orës 17:00. Në këtë orë, prokurori Ardian Braho mësohet se ka lënë zyrat e Prokurorisë për t’u kthyer në banesën e tij. Gjatë dëshmisë në Prokurori ai është shprehur i gatshëm për çdo verifikim, duke hedhur poshtë të gjitha aludimet që janë bërë ndaj tij.
ma.me
