Gjykata e Posaçme e Apelit për Korrupsionin dhe Krimin e Organizuar ka lënë në fuqi masën e sigurisë “arrest në burg” për shtetasin G.F., pas një vendimi të shpallur sot nga gjyqtarja Igerta Hysi.
Në një njoftim për mediat, bëhet me dije se trupa gjykuese shqyrtoi ankimin e paraqitur nga i pandehuri G.F., i cili kishte kundërshtuar vendimin nr. 88, datë 30.08.2025 të Gjykatës së Posaçme të Shkallës së Parë.
Apeli vendosi të rrëzojë ankesën dhe të miratojë vendimin e mëparshëm, duke e lënë në fuqi masën e arrestit për G.F. Vendimi mund të ankimohet më tej në Gjykatën e Lartë, brenda një afati 45-ditor nga dita e njoftimit.
Ndërkohë, në një vendim të mëhershëm, Gjykata Kundër Korrupsionit dhe Krimit të Organizuar kishte konfirmuar gjithashtu masën e arrestit me burg për ish-inspektorin e IMT-së, shtetasin K.Zh., i cili është gjithashtu nën hetim për veprimtari të dyshuar kriminale në kuadër të korrupsionit në detyrë.
