Rusia ndërmori në orët e para të 30 korrikut një nga sulmet më të mëdha ajrore të muajve të fundit ndaj Ukrainës, duke lëshuar dhjetëra raketa balistike, raketa lundruese dhe qindra dronë kamikazë. Sulmet goditën disa qytete, përfshirë Kievin, Lvivin, Kryvyi Rihun dhe rajonin e Poltavës.
Sipas autoriteteve ukrainase, nga sulmet kanë humbur jetën të paktën tetë persona, mes tyre dy fëmijë, ndërsa të paktën 45 të tjerë janë plagosur.
“Ky terror rus provon edhe një herë se mbrojtja nga kërcënimi i raketave ruse është detyra më e rëndësishme për të ruajtur jetën e njerëzve tanë. Kjo nuk është vetëm një detyrë e Ukrainës, por e të gjithë partnerëve tanë”, u shpreh Zelensky.
Sipas Forcave Ajrore të Ukrainës, Rusia lëshoi gjithsej 74 raketa lundruese, balistike dhe hipersonike, si dhe 284 dronë të tipit Shahed. Mbrojtja ajrore ukrainase arriti të rrëzojë 55 raketa dhe 265 dronë.
Në Kiev, shpërthimet nisën pak pas orës 01:00 të mëngjesit. Një person humbi jetën dhe dy të tjerë mbetën të plagosur. Rënia e mbetjeve të raketave shkaktoi zjarre në një garazh në distriktin Sviatoshynskyi dhe në një treg në lagjen Obolon. Në rajonin e Kievit u dëmtuan tre banesa në Brovary, ndërsa pesë persona, përfshirë një fëmijë, mbetën të plagosur.
Goditja më e rëndë u regjistrua pranë qytetit të Kryvyi Rihut, ku një raketë balistike Iskander-M goditi shtëpinë e një familjeje të madhe. Si pasojë humbën jetën katër të rritur dhe dy vajza, 5 dhe 12 vjeç. Tetë persona të tjerë u plagosën, mes tyre dy djem 6 dhe 15 vjeç.
Në rajonin e Poltavës, një person u vra pas goditjes së një magazine, ndërsa një terminal i kompanisë postare Nova Poshta u dëmtua, pa raportime për viktima.
Edhe qyteti perëndimor i Lvivit, vetëm rreth 70 kilometra nga kufiri me Poloninë, u godit nga raketat. Dy pallate u dëmtuan rëndë dhe të paktën 30 persona mbetën të plagosur. Ekipet e emergjencës vazhdojnë kërkimet mes rrënojave, pasi dyshohet se mund të ketë ende persona të bllokuar.
Shpërthime u raportuan gjithashtu në Ivano-Frankivsk dhe rajonet perëndimore të Ukrainës, ndërsa alarmet ajrore u aktivizuan në të gjithë vendin.
Si reagim ndaj sulmit rus, Polonia ngriti në fluturim avionët luftarakë për të mbrojtur hapësirën e saj ajrore. Për pak kohë u aktivizua edhe alarmi ajror në qytetin polak të Lublinit.
Një ditë para sulmeve, Zelensky kishte paralajmëruar se Rusia po përgatiste një ofensivë të re masive gjatë natës dhe u kishte bërë thirrje qytetarëve të respektonin alarmet ajrore.
Ndërkohë, më 28 korrik, Zelensky zhvilloi një takim në Shtëpinë e Bardhë me presidentin amerikan Donald Trump, ku u diskutua furnizimi me interceptorë për sistemet Patriot dhe mundësia e një armëpushimi të pjesshëm në sulmet ajrore mes Rusisë dhe Ukrainës.
Pas takimit, të dy liderët e cilësuan bisedën si pozitive, ndërsa Zelensky deklaroi se presidenti rus Vladimir Putin ka humbur iniciativën në luftë, por vijon të refuzojë shpalljen e një armëpushimi.
