Forcat ruse kanë shkelur armëpushimin e përkohshëm për të cilin ishte rënë dakord dhe janë duke bombarduar një korridor humanitar nga qyteti i rrethuar i Mariupol-it.
Lajmin e bën të ditur ministria e Jashtme e Ukrainës. Zëdhënësi Oleg Nikolenko tha se forcat ruse po sulmonin korridorin humanitar midis qytetit dhe Zaporizhzhia, 225 km në veri-lindje.
Tetë kamionë dhe 30 autobusë janë rrugës për të dërguar ndihma humanitare në qytet dhe për të evakuuar civilët në Zaporizhzhia, tha ai.
Autoritetet ukrainase dhe ruse kishin rënë dakord më herët hapjen e një korridori humanitar për të lejuar civilët të largohen, por mesa duket kjo do të jetë sërish e pamundur.
Kujtojmë se kjo nuk është hera e parë që Rusia shkel armëpushimet e përkohshme. Situata është kritike në Mariupol ku mungon ushqimi, uji dhe energjia elektrike. Presidenti ukrainas tha më herët se një fëmijë humbi jetën nga dehidratimi në qytet për shkak të mungesave të ushqimit dhe ujit të pijshëm.
