Presidenti ukrainas Volodymyr Zelensky kërkoi të mërkurën vendosjen e sanksioneve të forta ndaj Rusisë, teksa kundërshtari i saj ashpërsoi të mërkurën sulmet, duke lëshuar një numër rekord dronësh kamikazë dhe raketash në Ukrainën Perëndimore.
Disa qytete ishin në objektivin e predhave ruse mesnatën e 9 korrikut, por më i godituri rezultoi qyteti i Luckut. Shpërthime u dëgjuan edhe në Kiev, ku kryebashkiaku Vitali Klitschko njoftoi se qendra e qytetit u sulmua, megjithëse mbrojtësit kundërajrorë e evituan shumicën e rreziqeve.
Forcat Ajrore ukrainase raportuan se nga Rusia u lëshuan 728 dronë sulmues të llojit Shahed, si edhe shtatë raketa Kh-101 dhe Iskander-K, bashkë me gjashtë raketa Kinzhal. 296 dronë dhe të gjitha raketat u goditën, ndërsa 415 dronë u zhdukën nga radarët, thuhet në njoftimin e Forcave ajrore.
Më 8 korrik, Forcat Ajrore ukrainase njoftuan se Rusia ngriti në ajër edhe avionë MiG-31, duke vënë në rrezik të gjithë territorin e vendit për disa orë nga goditja me raketa.
Në 24 orë, të paktën pesë civilë humbën jetë si pasojë e sulmeve dhe të paktën 39 mbetën të plagosur nëpër rajone të ndryshme të Ukrainës.
Sulmet e fundit erdhën teksa presidenti amerikan Donald Trump premtoi se do i dërgojë Ukrainës 10 interceptorë Patriot për të rrëzuar raketat ruse, pas një bisede pa rezultat me homologun e tij rus, Vladimir Putin, për t’i dhënë fund luftës.
“Kjo provon edhe një herë tjetër nevojën e sanksioneve… Partnerët tanë e dinë si të bëjnë presion në mënyrë që Rusia të mendojë t’i japë fund luftës, jo të nisë sulme të reja,” reagoi presidenti Zelensky.
