Rusia, Irani dhe Turqia, mbështetës të palëve kryesore në luftën komplekse civile të Sirisë, të martën nuk arritën të bien dakord mbi përbërjen e një komiteti kushtetues sirian, të sponsorizuar nga OKB, por i bënë thirrje që të mblidhet në fillim të vitit të ardhshëm për të nisur një proces të qëndrueshëm paqësor.
Ministrat e jashtëm të të tre vendeve kishin shpresuar të nënshkruanin propozimin e tyre të përbashkët në një komision – i cili mund të çonte në zgjedhje – dhe të fitonte bekimin e Organizatës së Kombeve të Bashkuara.
Por deklarata e të treve nuk përmendte përbërjen e panelit, duke treguar për mosmarrëveshje të vazhdueshme mbi listat e kandidatëve të paraqitur nga presidenti sirian Bashar al-Assad dhe kundërshtarët e tij rebelë.
Mevlut Çavusoglu, duke folur për mediat shtetërore turke, tha vetëm se të tre pushtetet kishin dhënë “kontribut të rëndësishëm” për krijimin e panelit dhe që u vlerësuan emrat e sugjeruar nga udhëheqësi sirian./a.meta
