Një dron rus ka goditur ndërtesën kryesore të Shërbimit të Sigurisë së Ukrainës (SBU) në Kiev, në rrugën Volodymyrska, përballë Katedrales së Shën Sofisë.
Lajmi është bërë i ditur nga presidenti ukrainas, Volodymyr Zelensky, përmes një postimi në rrjetin social X.
Zelensky tha se droni ishte drejtuar drejtpërdrejt në zyrën e kreut të SBU-së, Oleksandr Poklad, ndërsa bëri të ditur se të gjitha shërbimet e emergjencës ndodhen në vendngjarje.
Presidenti ukrainas deklaroi gjithashtu se i ka kërkuar kreut të SBU-së që t’u japë forcave ruse një përgjigje të përshtatshme dhe, nëse është e mundur, në përputhje me sulmin e kryer.
“E udhëzova Pokladin t’u japë rusëve një përgjigje të përshtatshme, specifike dhe, kur të jetë e mundur, një përgjigje që korrespondon me këtë sulm, sapo gjithçka të jetë gati. Ushtria jonë do ta mbështesë këtë përgjigje”, shkroi Zelensky.
Ai shtoi se të gjithë personat e prekur nga incidenti do të marrin ndihmën e nevojshme.
“Fatkeqësisht, një dron rus goditi ndërtesën kryesore të Shërbimit të Sigurisë së Ukrainës në rrugën Volodymyrska në Kiev, përballë Katedrales së Shën Sofisë. Të gjitha shërbimet e emergjencës janë në vendngjarje. Të gjithë të prekurit do të marrin ndihmën e nevojshme”, deklaroi presidenti ukrainas.
Në përfundim të reagimit të tij, Zelensky e mbylli mesazhin me thirrjen: “Lavdi Ukrainës!”.
