Pas publikimit të raportit të inteligjencës në SHBA për financimet ruse ndaj forcave politike dhe bërjes publike të një financimi prej 500 mijë dollarësh të PD në kohën që drejtohej nga Lulzim Basha, ka reaguar edhe numri dy i PD-së në atë kohë, Edi Paloka.
Në një postim në faqen e tij në Facebook ai shkruan se, “kur futesh në pazar, blen dhe shet, po dhe të blejnë e të shesin…
Kujtesë për të tjerët!”, shkruan ai.
Me sa duket tani që janë ndarë nga Basha iu ka ardhur goja, por nuk mund të kalohet kjo punë thjesht duke bërë përgjegjës Bashën, pasi ai ka qenë numri dy i PD-së dhe vështirë ta besojë dikush se nuk e dinte se çfarë ndodhte me PD-në.
Po ashtu, goja i ka ardhur edhe Genc Pollos, që tani kërkon transparencë nga PD për 500 mijë dollarët që ka marrë nga Rusia, a thua se as ai nuk ka qenë pjesë e PD, kur skandali ka 5 vetë që është publikuar në media.
Dhe atëhere të gjithë e mbrojtën Bashën, duke thënë se akuzat janë qesharake.
“Sipas mediave ndërkombëtare, një zyrtar i qeverisë amerikane deklaroi se agjencitë e zbulimit të ShBA po informojnë konfidencialisht disa shtete për financimet e fshehta të Rusisë ne favor të politikanëve të caktuar në më shumë se 24 shtete. Ned Price, zëdhënësi i Departamentit të Shtetit të ShBA-së, i quajti këto financime të Kremlinit si sulm mbi sovranitetin e këtyre shteteve.
Një zyrtar amerikan anonim i deklaroi Agjencisë France Presse se Rusia shpenzoi afro 500 000 USD për të mbështetur Partinë Demokratike të Shqipërisë në zgjedhjet parlamentare të v 2017.
Si deputet i zgjedhur në vitin 2017, i kam besuar shpjegimeve publike të asokohe kryetarit Lulzim Basha se në asnjë mënyrë burimi i financimit nuk ka qenë Rusia ose të tjera shtete apo organizata jo miqësore me Shqipërinë (fatkeqësisht organeve partiake nuk iu paraqit, siç parashikon statuti, raporti financiar vjetor që mund të hidhte dritë mbi detajet e këtyre pagesave).
Këto financime kanë ndodhur jashtë buxhetit zyrtar te partisë dhe kanë përdorur guaskat fiskale jashtë vendit tonë. Këtu mund të kemi të bëjmë me parregullsi administrative e ligjore; mbase edhe me shkelje penale.
Por sot nuk kemi thjesht këto probleme, të cilat mbeten pjesërisht të pazgjidhura.
Sot kemi të bëjmë me pohime zyrtare amerikane se Basha mori financime në vitin 2017 nga një shtet atëherë jomiqësor dhe sot, me agresionin e përgjakshëm kundër Ukrainës dhe rendit ndërkombëtar, një shtet armik.
PDSh si partia që historikisht rrëzoi komunizmin dhe e orientoi Shqipërinë drejt Europës e Perëndimit nuk ka asnjë arsye të mbajë të tilla njolla, hije apo dyshime.
Prandaj do të propozoj zyrtarisht që udhëheqja aktuale, përfshi kryetarin Berisha e Sekretarin e Përgjithshëm Noka të ndërmarrin një audit të plotë të çështjes të drejtuar nga një Komision i Posaçëm. Raporti i auditimit duhet t’u prezantohet Kryesisë, Këshillit Kombëtar, Grupit Parlamentar si dhe të publikohet në ëebsitin e partisë.
Unë jam i ndërgjegjshëm se situata është komplekse: për shkak të ndërlikimeve gjyqësore një sërë tagrash nga aksesi në llogaritë bankare deri tek uebsiti i partisë janë ende të kontrolluara nga Basha e njerëzit e tij. Gjithashtu çfarëdo informacioni amerikan të marrë qeveria Rama mendoj se nuk do përdorë në interesin shtetëror por për të dëmtuar opozitën edhe tashti që Basha ka ikur. E ka provuar këtë edhe duke keqpërdorur ndërkombëtarë të caktuar.
Por këto nuk janë arsye që PD të mos pastrojë plehun e mbetur në Haurin e Avgjisë. Qoftë edhe duke thirrur para Komisionit të Posaçëm të Auditimit të tërë zyrtarët partiakë përgjegjës; përfshi edhe ish kryetarin e partisë. Dhe duke bërë transparencë të plotë mbi çështjen”, shkruan Pollo.
