Moska dhe Pekini janë duke konsideruar mundësinë e ndërtimit të përbashkët të centraleve bërthamore në vendet e treta të botës, bëri të ditur zëvendëskryeministri i Rusisë, Dmitry Rogozin. Ai, duke folur në ekspozitën e dytë Ruso-Kineze të zhvillur në qytetin kinez, Harbin, tha, transmeton aa, se ka një mirëkuptim serioz për mundësinë dhe nevojën për të arritur një marrëveshje gjithëpërfshirëse për bashkëpunim në sferën atomike që përfshin projekte të ndryshme në vendet e treta të botës.
“Ne do të vëmë në operim njësinë e parë lundruese të energjisë me Kinën brenda një viti. Kjo do të thotë bashkëpunimi i mëtejshëm jo vetëm në territorin e Kinës, por edhe hyrja e mundshme e të dyja shteteve në vendet e treta për ndërtim”, citohet të ketë thënë Rogozin.
Manifestimi i dytë EXPO Ruso-Kinez i cili filloi në Harbin dhe do të vazhdojë deri të premtën, ka për qëllim zhvillimin e marrëdhënieve ekonomike ndërmjet këtyre dy vendeve.
