Edhe pse diplomacia vijon pa u ndalur për të vendosur paqen në Ukrainë, lufta nuk jep sinjal zbutje. Rusia ndërmori një valë sulmesh masive në jug të Ukrainës. Autoritetet rajonale në Odesa flasin për godina banimi e infrastrukturë energjetike të goditura.
Një zjarr I madh shpërtheu në një traget turk të ankoruar në qytetin port pas sulmeve raketore. Po ashtu në Rusi guvernatori rajonal Roman Busargin tha se 2 persona ishin vrarë në Saratov pasi një sulm me dronë goditi një pallat.
Ndërkohë Shërbimi i Sigurisë në Ukrainë, SBU, njoftoi se dronët e Kievit kishin qëlluar 2 impiante të naftës që I përkisnin kompanisë ruse Lukoil. Impianti Filanovski, pjesë e fushës më të madhe të naftës në Kaspik u vu në shënjestër edhe më herët gjatë javës.
