Kryetari i grupit parlamentar të Partisë Demokratike, Alfred Rushaj, tha këtë të martë se selia blu nuk ka marrë asnjë propozim për Vettingun.
“Ne nuk kemi marrë propozime nga askush për Vettingun. Kjo është një çështje që nuk është diskutuar me asnjë partner dhe asnjë forum deri tani. Ne do të kemi qëndrim kur të ketë një propozim konkret dhe do të jetë pjesë e një strategjie më të madhe. E rëndësishme është që të vihen interesat e shqiptarëve dhe jo interesi i Ramës. Ne s’kemi asnjë kërkesë nga partnerët deri tani. Nuk kemi marrë asnjë kërkesë nga askush deri tani. Unë që jam ngarkuar për këtë pjesë si pjesë e një procesi më të madh. Jemi të gatshëm, të diskutojmë për çështje shumë më të rëndësishme siç është ndryshimi i Kodit Zgjedhor, ndryshime që kanë të bëjnë me interesin e shqiptarëve. Strategjitë si do të negociojmë do të paraqiten në momentin konkret kur të kemi diçka konkrete”, tha Rushaj.
Alfred Rushaj, u shpreh se mes opozitës dhe mazhorancës ka një dakordësi për ngritjen e Komisionit Hetimor për zgjedhjet e 25 Prillit. Rushaj tha nga Kryesia e Kuvendit se mazhoranca po shqyrton propozimet për Komisionin Hetimor për inceneratorët. Sa i përket çështjes Becchetti, Rushaj u shpreh se mosngritja e Komisionit Hetimor për të është e turpshme pasi PS me këtë rast mbron interesin e kryetarit të saj.
“Ka një dakordësi për objektin e hetimit për komisionin hetimor për zgjedhjet sipas propozimit që ne bëmë. Nuk ka dakordësi për inceneratorët. Duke që pala tjetër po shqyrton propozimet tona dhe do vijë për një objekt të dakordësuar. Duket që ka një vendim të palës tjetër për të mos pranuar për Beccheti. Justifikimi është një letër që paska sjellë Avokati i shtetit. Socialistët thonë se ngritja e një komisioni hetimor për Becchettin është kundër interesit të Shqipërisë. Mosngritja e këtij komisioni është kundër interesit të Ramës. Është e turpshme që PS barazon interesin e shqiptarëve me interesin e Edi Ramës dhe disa nëpunësve të tij, kjo në shkelje të plotë të Kushtetutës dhe vendimeve të qarta të GJK. Ne nuk do ta pranojmë këtë pjesë. Do të bëjmë çfarë kemi mundësi të bëjmë që ky komision të ngrihet dhe shqiptarët të kuptojnë pse duhet të paguajnë 120 milionë Euro”.
Rushaj komentoi edhe vendimin e Bashës për të ndëshkuar Nokën.
“Është një vendim që është marrë në përputhje me kompetencën që kryetari ka. Është një vendim i brendshëm i PD dhe do të respektohet çdo procedurë që është e nevojshme për t’u respektuar për atë gjë”.
/a.r
