Viktor Motorin, bashkë me familjen e tij, mund të hipte në një avion dhe të mbërrinte në Krime vetëm 4 orë më pas, për t’u relaksuar e për të pushuar i qetë në apartamentin e tij të pushimeve atje. Tani i duhet të fluturojë drejt Moskës, e nga atje, të udhëtojë me tren për një ditë e gjysmë. Lufta në Ukrainë, tani mbi 18 muaj nga nisja, e ka bërë kalimin në kufi shumë më të vështirë, edhe për vetë rusët, që i tremben ndonjë sulmi nga ajri apo edhe tokësor.
Gjithsesi, kjo sipas Viktorit, është një rrugë disi më e sigurtë, për të kaluar më pas pushime në vendin e tij të preferuar, në Krime, në rajonin e Detit të Zi, të cilin Moska e aneksoi nga Ukraina në vitin 2014.
Për shumë, siguria është faktor kryesor, sidomos pas dy sulmeve të mëdha në urën e Krimesë, që lidh rrugët e Rusisë, por edhe hekurudhat me gadishullin. Por, gjithsesi, duke marrë parasysh edhe rreziqet, Viktor Motorin udhëtoi nga qyteti Khanty-Mansiysk në perëndim të Siberisë, drejt Krimesë, vendosi që këtë udhëtim mes frikës e dëshirës për të pushuar ta bëjë bashkë me familjen e tij të re, sepse mendon që ia vlen rreziku për t’u shplodhur disa ditë.
Rusët prej dekadash i kishin hedhur sytë nga ky rajon, nga bregu i Krimesë, ndoshta që nga regjimi i carëve rusë. Dhe sot, ky rajon është zgjedhja e parë e rusëve për të pushuar, pavarësisht luftës kilometra më tutje. Por, zhurma deri këtu zor se mbërrin.
Sanksionet e perëndimit, së pari mbi fluturimet, e kanë dobësuar jashtëzakonisht shumë rublën ruse. Kështu, kostot e udhëtimit të shtetasve rusë drejt destinacioneve të tjera popullore, ndër vite të preferuara për ta, si Turqia apo Tajlanda, tashmë janë rritur dhe një paketë kushton deri në 10-fish më shumë.
Hapësira ajrore tregtare për në Krime është mbyllur që nga koha kur Rusia nisi operacionin special ushtarak në Ukrainë në shkurt 2022 dhe kjo do të thotë se nga ajo kohë e deri tani, kushdo që mendon të pushojë atje, do duhet të udhëtojë ose me makinë, për shumë gjatë, ose me tren. Në çdo rrugë që mund të zgjedhësh, pikëpyetjet janë të shumta, sidomos kur kalon mbi urën e Krimesë.
Alexei Voklov, Presidenti i Unionit Kombëtar të Mikpritjes, thotë në një intervistë se numri i turistëve në Krime, për shkak të operacionit ushtarak, vjet dhe sivjet ka rënë me 20-30%, por gjithsesi 6 apo 6,5 milionë njerëz e kanë zgjedhur edhe këtë herë si opsion të tyre për pushime.
Në të tjerë resorte ruse pranë Detit të Zi, më pak të rrezikuar nga sulmet, kërkesat janë rritur. Voklov thotë se hotelet në Sochi po punojnë në 100% të kapacitetit të tyre, madje edhe qyteti port i Novorossiysk po sheh rritje, nga 6-10% të numrit të vizitorëve e rezervimeve.
Më pak vizitorë në Krime do të thotë më shumë të tillë në Kaliningrad, në Detin Baltik apo Dagestan, rajonin verior të Kaukazit rus.
Për një çift rus, zgjedhja për të pushuar në Krime rezultoi fatale. Të dy u vranë ndërsa vajza e tyre, 14 vjeçe, mbeti e plagosur, kur makina e tyre shpërtheu teksa ata kalonin urën e Krimesë më 17 korrik, teksa udhëtonin në orët e natës për të mbërritur në bregdet, për të shmangur fluturimin. Shefi i shërbimit të sigurisë së Ukrainës, Vasil Maliuk, tha më vonë se e merrte përsipër ai përgjegjësinë për këtë sulm, por edhe sulmit të mëparshëm, atë të tetorit 2022, në të njëjtën urë.
Sulmet e forcave ukrainase, sidomos ato me dron, janë regjistruar ditët e fundit edhe në hapësirën ajrore mbi Krime. 42 madje brenda një dite të vetme. Të gjitha, siç tha Ministria ruse e Mbrojtjes apo edhe kryebashkiaku rus i Krimesë, të rrëzuara. Gjithsesi, pavarësisht luftës, disa rusë të intervistuar nga Reuters thonë se nuk shohin asnjë rrezik nga Ukraina dhe nuk i tremben luftës.
/a.r
