Ish-ministrat Genc Ruli dhe Arben Imami i kanë kërkuar dje gjatë mbledhjes së grupit parlamentar Lulzim Bashës të intensifikojë aksionin opozitar.
“Panorama” duke zbardhur debatin, shkruan se në mbledhjen me dyer të mbyllura, kreu i demokratëve u përball me propozime që nga bojkoti i Parlamentit dhe deri te fillimi i menjëhershëm i protestave të ngjashme me atë të 8 dhjetorit të vitit 2015.
Ish-ministri Genc Ruli kërkoi nga kreu i demokratëve Basha që të rishikojë qëndrimin që opozita duhet të mbajë në raport me Parlamentin. Sipas Rulit, Partia Demokratike i ka konsumuar të gjitha praktikat për denoncimin e qeverisë, por ato duket se nuk po japin rezultat dhe nuk po ngjallin reagimin e duhur qytetar.
Në një kohë kur qeveria vijon e qetë punën e saj sa u takon koncesioneve dhe vendimeve arbitrare, Ruli ka propozuar edhe shqyrtimin e një opsioni për largimin nga Parlamenti. Por kundër këtij vendimi kanë qenë deputetët Astrit Patozi dhe Ridvan Bode.
Sipas Patozit, opozita, ndonëse e vonuar në qëndrimin e saj, duhet të investohet e gjitha për realizimin e Reformës Zgjedhore, raporton “Panorama”.
Patozi i kërkoi Bashës që PD-ja të ndezë motorët për fushatën, përballë një qeverie që po riaktivizon persona me precedentë penalë, që të rifitojë zgjedhjet.
Ndërkohë ish-ministri i Financave, Ridvan Bode, u shpreh kundër bojkoteve të opozitës, pasi, sipas tij, nuk ka asgjë të re që PD-ja t’u kërkojë shqiptarëve të ngrihen në protesta. Në fjalën e tij, ish-kryeministri Berisha ka propozuar që demokratët të mos votojnë amnistinë e propozuar nga qeveria./a.m.
