Kryetari i grupit parlamentar të Partisë Socialiste, Gramoz Ruçi, ka vlerësuar në një intervistë për “Shqiptarja.com” se kandidati i majtë për Bashkinë e Tiranës, Erion Veliaj, si njeriu me vizionin e duhur për kryeqytetin, ka edhe mbështetjen e plotë të të gjithë socialistëve dhe përgjegjshmërinë për detyrën që do të marrë. “Ai ka mbështetjen e të gjithë strukturës dhe bazës së Partisë Socialiste. Kjo pyetje nuk ka nevojë për përgjigje, pasi PS-ja e ka treguar se e mirëpret Erion Veliajn qysh hershëm, kur ai u bë pjesë e strukturave tona”, ka thënë Ruçi. Mandej, ai ka komentuar dhe vlerësuar me nota të larta fushatën e zhvilluar deri më tani për Bashkinë e Tiranës dhe programin e Veliajt.
Z. Ruçi, si e komentoni fushatën e deritanishme të z. Veliaj për Bashkinë e Tiranës? A po bën ai një fushatë pozitive siç premtoi dhe a është gjithëpërfshirës?
Kam konsideratat e mia më të larta për zotin Veliaj. Ai është një kandidat që ka vizionin e duhur, ka energjinë e duhur, ka përkushtimin e duhur, por edhe ambicien e duhur për të kryer përgjegjshmërish detyrën që po kërkon të marrë. Jam i sigurt që me votëbesimin që do të marrë nga qytetarët e Tiranës, do të jetë një kryebashkiak i suksesshëm për 4 vitet e ardhshme.
Ju e keni ndjekur programin e tij. A duket ai realist?
Programi sigurisht që është realist. Madje, Erion Veliaj më ka habitur me përkushtimin e tij në përgatitjen e programit. Në një kohë fare të shkurtër dhe me shpejtësi mbresëlënëse, ai ka evidentuar me detaje të gjitha problemet që ka kryeqyteti, nga njësitë bashkiake, tek komunat më të largëta. Di me përpikmëri çdo hall të qytetarëve, nga puseta, tek problemet më të mëdha. Është e rëndësishme që çdo kandidat të njohë problemet e bashksië përkatëse dhe të gjejë zgjidhje. Në këtë drejtim Veliaj është përgatitur shumë mirë.
A ka Erion Veliaj mbështetjen e të gjithë bazës socialiste?
Kjo as që diskutohet. Ai ka mbështetjen e të gjithë strukturës dhe bazës së Partisë Socialiste. Kjo pyetje nuk ka nevojë për përgjigje, pasi PS-ja e ka treguar se e mirëpret Erion Veliajn qysh hershëm kur ai u bë pjesë e strukturave tona. Të gjitha dyshimeve ai ju ka dhënë përgjigje gjatë drejtimit të Ministrisë së Punës dhe Mirëqenies Sociale, ku me përkushtimin e tij, punën dhe veprimet e tij, ka ndërmarrë reforma të mëdha, të cilat e bëjnë Veliajn të jetë krenar për të gjithë socialistët.
Ç’koment keni për rivalin kryesor të zotit Veliaj, Halim Kosovën?
Unë nuk merrem me kundërshtarët, por për Halim Kosovën kam konsideratë maksimale personale. Mirëpo, në këtë fushatë ai është në ndërmarrjen e gabuar, në vendin dhe kohën e gabuar.
