Gjatë vizitës zyrtare në Gjermani, kryetari i Kuvendit, Gramoz Ruçi dhe kryetari i Grupit Parlamentar të PS, Taulant Balla u takuan edhe me Ministrin e Shtetit për Çështje të BE, Michael Roth. Gjatë këtij takimi, Ruçi e vuri theksin te mbështetja e qeverisë gjermane dhe kancelares Merkel në procesin e vendimmarrjes së Vendimit të Këshillit Europian për rekomandimin për çeljen e negociatave në qershor 2019. Ruçi i shprehu Ministrit Roth mirënjohjen për angazhimin e tij personal, si një zë i fuqishëm në mbështetje të rrugëtimit të Shqipërisë drejt integrimit europian.
“Çelja e negociatave të anëtarësimit është beteja kryesore e Kuvendit, Qeverisë dhe gjithë qytetarëve shqiptarë, të cilët janë unanimisht në mbështetje të këtij proçesi”, nënvizoi Kryetari i Kuvendit, duke shprehur bindjen se Gjermania do të vazhdojë të japë mbështetjen e saj, duke njohur e vlerësuar përparimin e Shqipërisë në arritjen e objektivave për çeljen e negociatave. Nëpërmjet ministrit Roth, kryetari i Kuvendit falenderoi Qeverinë gjermane për vlerësimin se Shqipëria është një garanci për paqen dhe stabilitetin në Ballkan dhe se luan një rol thellësisht pozitiv në kontekstin rajonal. Ruçi i shprehu ministrit Roth vullnetin dhe përkushtimin maksimal të Kuvendit, Qeverisë dhe institucioneve shqiptare për të punuar dhe merituar plotësisht hapjen e negociatave në qershor 2019.
Nga ana e tij, ministri Roth vlerësoi arritjet e reformës në drejtësi, si një reformë e sukseshme dhe vlerësoi partneritetin e ngushtë midis të dy vendeve në funksion të procesit të integrimit europian te Shqipërisë. “Qëndrimi i Politikës së Jashtme Gjermane, vazhdon të mbetet mbështetës për Shqipërinë në rrugëtimin e saj drejt integrimit në BE“, tha Roth, duke vënë theksin te realizimi i reformave. Ministri Roth shprehu gjithashtu keqardhjen për mos anëtarësimin e Kosovëd në INTERPOL.
Kryetari Ruçi e informoi ministrin Roth mbi sukseset e reformës në drejtësi dhe të procesit të Vetting-ut. “Parlamenti ka miratuar 20 ligje, pjesë të paketës prej 27 projektligjesh të reformës në drejtësi, si edhe ka në shqyrtim pjesën tjetër të këtyre projektligjeve. Operacioni Ndërkombëtar i Monitorimit ka konstatuar se ky procesi i Vetting-ut është kryer në mënyrë tërësore e profesionale. Me formimin e Këshillit të Emërimeve në Drejtësi, Këshillit të Lartë të Prokurorisë dhe i Këshillit të Lartë të Gjyqësorit është hapur rruga për plotësimin dhe krijimin brenda muajve të ardhshëm të institucioneve të qeverisjes së sistemit tëdrejtësisë”, vuri në dukje Kryetari i Kuvendit.
Kryetari i Kuvendit e informoi bashkëbiseduesin edhe mbi përkushtimin e Kuvendit dhe të Qeverisë si edhe arritjet e Shqipërisë në luftën kundër korrupsionit, krimit të organizuar dhe trafiqeve, ecurinë e reformës zgjedhore dhe përpjekjet e maxhorancës për të ndërtuar një proces bashkëpunues e produktiv me opozitën për kurorëzimin e reformës, si edhe përpjekjet dhe rezultatet në dekurajimin e kërkesave të pabazuara të qytetarëve shqiptarë për azil.
/a.meta
