“Drejtësia sot është e pavarur”, Rama: Historia do mbajë mend vetëm një emër, Partinë Socialiste!

Në Asamblenë e Partisë Socialiste, kryeministri Edi Rama gjatë fjalës u ndal te reforma në drejtësi, pavarësia e saj dhe procesi i riorganizimit të PS-së në funksion të zgjedhjeve vendore të vitit 2027.

Ai e cilësoi këtë periudhë si historike, duke theksuar se historia do të mbajë mend vetëm një emër: Partinë Socialiste të Shqipërisë.

Rama tha se drejtësia është e pavarësuar dhe se mazhoranca nuk ka kapacitet të ndërhyjë në zinxhirin e sistemit gjyqësor.

“Ne nuk kemi kapacitetin të ndërhyjmë në këtë zinxhir. Askush nuk mund të tregojë fakte se pushteti politik dhe pushteti ekzekutiv apo legjislativ lidhen me proceset e brendshme të sistemit të drejtësisë. Sot mund të thuhet gjithçka, por askush nuk mund të japë fakte për mungesën e pavarësisë së drejtësisë. Drejtësia sot është e pavarur,” u shpreh ai.

Kryeministri shtoi se kjo pavarësi është arritur në një “shtrat të përgjakur dhe të ndyrë”, ku për më shumë se një shekull drejtësia nuk ka qenë e lirë dhe e paanshme. “Ne e kemi dorëzuar shpatën e sistemit gjyqësor te vetë sistemi gjyqësor. Ne kemi qeverinë e vendit, por nuk kemi qeverinë e drejtësisë,” tha Rama.

Ai njoftoi nisjen e një procesi të kombinuar të komunikimit në gjithë territorin dhe riorganizimit të strukturave të PS-së në funksion të zgjedhjeve vendore të vitit 2027.

“Procesi duhet të jetë i hapur, me njerëzit përtej guackës së organizatave të PS-së. Organizatat duhet të dalin të energjizuara nga procesi i brendshëm zgjedhor. Me njerëzit dhe për njerëzit do të thotë përballje në gjithë territorin me të vërtetat tona, me punët për Shqipërinë,” u shpreh ai, duke shtuar se ky proces është i domosdoshëm për të përgatitur partinë për zgjedhjet e ardhshme.

Rama e cilësoi durimin e socialistëve si “heroik” përballë akuzave dhe “llumit politik e mediatik”. “Institucionet demokratike nuk rriten aq shpejt sa fëmijët. Një fëmije i duhen 18-20 vjet, institucioneve shumë më tepër. Ne jemi frymëzuesit dhe mbështetësit e reformës në drejtësi. Durimi ynë duhet të jetë heroik përballë gjithë llumit,” tha ai.

Rama theksoi se PS është e vetmja forcë që ka hapur një shteg historik për drejtësinë, duke dorëzuar “shpatën e gjyqësorit” te vetë pushteti gjyqësor.

“Ne kemi qeverinë e vendit, por nuk kemi qeverinë e drejtësisë. Ne jemi këtu vetëm për të bërë durim strategjik në funksion të vizionit tonë për transformimin e drejtësisë. Historia do mbajë mend vetëm një emër, Partinë Socialiste të Shqipërisë. Do mbajë mend këtë kohë të reformës dhe pavarësimit të drejtësisë, të tjerat do i marrë era,” përfundoi ai.

Ky fjalim i Ramës në Asamblenë e PS-së shënon një moment të rëndësishëm politik, ku ai e vendos reformën në drejtësi si gur themeli të trashëgimisë së Partisë Socialiste dhe si një proces që kërkon durim, përballje dhe vizion afatgjatë.