Kryetari i grupit parlamentarë të PS-së, Gramoz Ruçi, e komentoi si një akt kurajoz dorëheqjen e deputetit të PS, Arben Ndoka. Sipas tij, ky veprim synon të krijojë mundësi që Ndoka të vazhdojë betejën e tij ligjore. “Tashmë të gjithë duhet të heshtim. Le të flasë drejtësia. Kjo dorëheqje i shërben vetë Ndokës, por edhe PS”, u shpreh Ruçi.
Kreu i grupit parlamentarë të PS me të këtë rast ka akuzuar opozitën për falsitet në kërkesat e saj për dekriminalizimin pasi, sipas tij, “PD nuk ka paraqitur deri tani asnjë draft në komision për këtë çështje”. Sipas Ruçit, deklaratat e PD për dekrininalizim janë vetëm për show politik.
Lidhur me çështjen Prenga, Ruçi nënvizoi se PS e dha vendimin e saj nëpërmjet votimit në Kuvend, pasi, sipas tij, “askush nuk është mbi ligjin dhe kushdo që shkel ligjin duhet të ballafaqohet me drejtësinë”.
