Kryetari i grupit parlamentar të PS Gramoz Ruçi, bëri të ditur sot nga Fieri se ka qarqe të caktuara që nuk duan zgjedhjen e Presidentit dhe zhvillimin e zgjedhjeve. Këto forca, sipas tij, duan ta lenë vendin pa President. “Presidenti do të zgjidhet sipas Kushtetutës. Nuk do të lejojmë që të përsëritet një ‘97 tjetër në vend. Forca të caktuara duan destabilizimin e vendit. Qeveria aktuale ikën vetëm me mocion mosbesimi”, deklaroi Ruçi.
Gramoz Ruçi ka konfirmuar gjithashtu se koalicioni PS-LSI do të vazhdojë edhe për katër vjet të tjera. Kreu i grupit parlamentar të PS u shpreh se të gjithë ata që kanë parashikuar se koalicioni nuk do të vazhdojë dhe pas zgjedhje do të zhgënjehen.
“Lidhur me parashikimet se koalicioni do të shpërbëhet, ju them se të gjithë ata që parashikuan diçka të tillë do të zhgënjehen”, tha Ruçi.
