Sekretari amerikan i Shtetit, Marco Rubio, deklaroi se Shtetet e Bashkuara janë të gatshme të ndjekin një dialog konstruktiv me Iranin dhe të arrijnë një marrëveshje, nëse kjo çon drejt një rezultati pozitiv dhe të qëndrueshëm.
Gjatë takimit të përbashkët mes SHBA-ve dhe Këshillit të Bashkëpunimit të Gjirit (GCC) në Bahrein, Rubio theksoi se Uashingtoni nuk synon një marrëveshje “me çdo çmim”, por kërkon një pakt që të jetë “i mirë, real, i verifikueshëm dhe i zbatueshëm nga të dyja palët”.
Ai u shpreh se SHBA-të janë të gatshme të ndihmojnë Iranin nëse vendi zgjedh të fokusohet te mirëqenia e qytetarëve të tij, pavarësisht dallimeve që ekzistojnë mes dy shteteve.
Rubio vendosi edhe disa kushte të qarta për një marrëveshje të mundshme, duke theksuar se Irani nuk do të lejohet të pajiset me armë bërthamore dhe as të vendosë tarifa për përdorimin e Ngushticës së Hormuzit, një nga rrugët më të rëndësishme detare për tregtinë globale të energjisë.
“Kjo është thjesht lojë me fjalët. Quajeni tarifë apo pagesë, në fund është e njëjta gjë”, tha Rubio, duke shtuar se SHBA-të nuk do të pranojnë që Ngushtica e Hormuzit të kontrollohet nga një shtet i vetëm.
Shefi i diplomacisë amerikane siguroi gjithashtu aleatët e Uashingtonit në Gjirin Persik se çdo marrëveshje me Teheranin nuk do të cenojë sigurinë dhe stabilitetin e tyre.
“Ne jemi të hapur për paqe, por një paqe që të jetë e qëndrueshme, reale dhe që në asnjë mënyrë të mos dëmtojë sigurinë apo mirëqenien tonë dhe as sigurinë e aleatëve tanë në rajon”, deklaroi Rubio në Manama.
Deklaratat e tij vijnë në një moment kur marrëdhëniet mes SHBA-ve dhe Iranit mbeten të tensionuara, ndërsa diplomacia po shihet si rruga kryesore për të shmangur përshkallëzimin e mëtejshëm në rajon.
