Tensionet mes Shteteve të Bashkuara dhe Kubës janë përshkallëzuar ndjeshëm, pasi Sekretari amerikan i Shtetit, Marco Rubio, deklaroi se Kuba përbën “kërcënim për sigurinë kombëtare” të SHBA-së dhe se mundësia për një marrëveshje diplomatike me Havanën “nuk është e lartë”.
Deklaratat e Rubios erdhën vetëm një ditë pasi autoritetet amerikane ngritën akuza ndaj ish-presidentit kuban Raúl Castro lidhur me rrëzimin e dy avionëve civilë në vitin 1996, incident ku humbën jetën katër persona, përfshirë shtetas amerikanë.
Duke folur para gazetarëve, Rubio tha se SHBA preferon një “zgjidhje diplomatike”, por shtoi se presidenti Donald Trump ka “të drejtën dhe detyrimin” për të mbrojtur vendin nga çdo kërcënim. Ai akuzoi gjithashtu Kubën se është “një nga sponsorët kryesorë të terrorizmit në rajon”.
Nga ana tjetër, ministri i Jashtëm kuban Bruno Rodríguez Parrilla i hodhi poshtë deklaratat, duke i quajtur “gënjeshtra” dhe duke insistuar se Kuba nuk ka përbërë kurrë kërcënim për SHBA-në. Ai akuzoi administratën amerikane për përpjekje për të nxitur agresion ushtarak kundër ishullit.
Ndërkohë, Kuba vazhdon të përballet me krizë të thellë energjetike dhe mungesa ushqimore, situatë që autoritetet kubane e lidhin me bllokadën ekonomike amerikane. Rubio deklaroi se Uashingtoni ka ofruar 100 milionë dollarë ndihmë humanitare për popullin kuban.
Administrata Trump ka shtuar presionin ndaj regjimit komunist në Havana, ndërsa në SHBA po diskutohet hapur mundësia e ndryshimeve politike dhe ekonomike në Kubë.
