Rezidenca Studentore Universitare Nr. 1 dhe Shërbimi Social Shtetëror kanë nënshkruar një marrëveshje ndërinstitucionale, e cila ka në fokus ushtrimin e praktikës profesionale për studentët e Fakultetit të Shkencave Sociale dhe të Fakultetit të Mjekësisë.
Kjo marrëveshje, e firmosur nga Drejtori i Përgjithshëm i RSU Nr. 1, z. Olsi Shahini, dhe Drejtoresha e Përgjithshme e Shërbimit Social Shtetëror, znj. Reme Lala synon të krijojë kushte konkrete për zhvillimin profesional të studentëve, duke i afruar ata me përvojën praktike dhe kërkesat e tregut të punës.
Në kuadër të kësaj marrëveshjeje, studentëve do t’u ofrohen mundësi për realizimin e praktikës profesionale, si dhe trajnime të orientuara drejt nevojave bashkëkohore të sektorit social dhe shëndetësor.
Përmes kësaj marrëveshjeje, palët synojnë të forcojnë ndërveprimin mes formimit akademik dhe praktikës profesionale, duke mbështetur përgatitjen dhe punësimin e studentëve të rinj në fushat përkatëse, si dhe forcimin e lidhjes mes arsimit universitar dhe shërbimeve sociale.
