Rrugorja: Paguani gjobat ose do t’u bllokohet makina
Policia rrugore njofton qytetarët që nuk kanë paguar gjobat, se duke nisur që nga 1 shtatori do të merren masa të ashpra, deri në bllokimin e mjetit. Drejtuesi i mjetit që nuk paguan gjobat e vendosura nga policia rrugore për shkelje të ndryshme administrative, rrezikon të mbetet në këmbë.
Policia rrugore ka paralajmëruar se do të nisë bllokimin e mjeteve të ndëshkuara me gjobë, për shkelje të ndryshme rrugore. Policia paralajmëroi se bllokimet do të nisin prej datës 1 shtator, ndërsa mjetet do të zhbllokohen vetëm, pasi të jenë shlyer detyrimet.
Sipas burimeve të policisë do të bllokohen mjetet që janë ndëshkuar qoftë edhe me një gjobë, të cilës i ka kaluar afati prej 30 ditësh. Lajmi është konfirmuar zyrtarisht nga policia e kryeqytetit nëpërmjet një njoftimi zyrtar, ndërsa u ka bërë thirrje drejtuesve të mjeteve që të nisin të paguajnë detyrimet.
Gjithashtu, policia paralajmëroi se për rastet kur brenda tre muajve nuk shlyen detyrimet dhe mjeti nuk tërhiqet nga pronari, ai do të konfiskohet. Drejtoria e Policisë së Tiranës dhe Komisariati Rajonal i Policisë Rrugore kërkuan mirëkuptimin dhe ndërgjegjësimin e përdoruesve të mjeteve që të verifikojnë targat e mjeteve dhe të likuidojnë gjobat sipas afatit të parashikuar.
