Kryeministri Edi Rama replikoi me ish-ministrin e Financave, Ridvan Bode, duke deklaruar se gjatë qeverisjes së demokratëve, nuk u subvencionuan fermerët. Sipas Ramës, qeveria e djathtë i la fermerët në mëshirë të fatit.
“Ju e latë fermerin në mëshirë të fatit. Nuk shpërndatë asnjë subvencionim për fermerët në 8 vite qeverisje”, u shpreh Rama.
Kreu i qeverisë theksoi se fermeri sot është në situatë tjetër. Sipas tij, fermerët e regjistruar marrin deri në 20% rimbursim.
“Ne formalizuam bujqësinë. Sot, pa NIPT fermeri nuk merr rimbursimin. Para në avancë nuk japim, por subvencionojmë deri në 20% të prodhimit. Që të flisni për bujqësinë, ju duhet të hiqni dorë nga ajo se çfarë keni bërë. Ju nuk mund të merreni si pikë referimi. Ju s’jeni personat që mund të flisni se çfarë mund të bëhet për fshatin. Shpresoj t’ju ndihmojë Partia Agrare”, tha Rama.
Kryeministri foli edhe për fondin e garancive bujqësore, i cili stimulon kreditë e buta për fermerët, duke hyrë shteti si garant në banka.
Rama iu adresua edhe akuzave të vazhdueshme nga opozita se qeveria e tij nuk ka bërë asnjë kilometër rrugë.
“Qeveritë vazhdojnë punën e njëra-tjetrës, megjithatë nuk duhet parë numri i kilometrave të kontraktuar. Ju keni kontraktuar rrugë në Shishtavec, për shembull, por rrugë atje nuk ka. Na thoni se nuk kemi ndërtuar rrugë rurale. E vërtetë, nuk kemi ndërtuar, por sepse më parë kemi shlyer borxhet e lëna”, tha Rama.
Bode: Bujqësia sot, më pak konkurruese
Ish-ministri i Financave, Ridvan Bode, akuzoi qeverinë për mungesë vëmendje ndaj sektorit bujqësor. Bode tha se në 8 vite, qeveria e djathtë asfaltoi 8 mijë km rrugë rurale, ndërsa qeveria e re e pas 2013-ës, ndërpreu projektin e zhvillimit rural. Sipas Bodes, në këto kushte, rajone të tëra të thella mbeten në izolim, duke i dhënë një goditje bujqësisë në këto zona.
“Ju po e bëni bujqësinë më pak konkurruese. Keni sjellë disa eskavatorë? Kjo është gjëja më periferike që ka sot qeveria. Për ato kanalet kulluese, qeveria juaj pat firmosur një kredi me qeverinë japoneze. Pyeteni Pandin dhe ministrin e Bujqësisë që keni pasur në atë kohë. 200 mln dollarë e u mbyll ai projekt. Sot jeni duke ekzekutuar disa projekte të BB që u firmosën në vitin 2012-ë, rrjeti kullues dhe vaditës, janë diku te 100 mln euro. Keni tre vite, më tregoni një projekt që keni sjellë në ndihmë të bujqësisë, asnjë. Sigurisht që ka nevojë, por para së gjithash ju duhet të pyesni veten se çfarë keni bërë për bujqësinë. Ndërpretë programin e infrastrukturës në zonat rurale. Ne asfaltuam në zonat rurale mbi 8 mijë km rrogë, në tre vite nuk është hedhur asnjë lopatë zhavorr. Nxorëm nga izolimi territore të vendit. Ju e ndërpretë atë projekt dhe mbeten ende pjesë të tëra të territorit të vendit që nuk lidhen me tregun. Keni lënë përgjysmë edhe ato që ishin në proces ato kohë”, u shpreh Bode.
