Nga Cërriku ku zhvilloi një dëgjesë me qytetarët në kuadër të nismës së ‘Llogaridhënies’ kryeministri Edi Rama u shpreh se në Elbasan janë mbi 1500 vende të lira pune, ndërsa deri në fund të vitit objektivi është punësimi i 25 mijë personave. Gjatë bashkëbisedimit me qytetarët, Rama u shpreh se standardet janë kryefjala e investimeve publike, ndërsa e vendosi theksin te rruga Tiranë-Elbasan.
“Ne nuk jemi këtu se do të na jepni votën në fund të qershorit, nuk jemi këtu për të na dhënë vota, por për t’u dëgjuar juve. Rruga Tiranë-Elbasan u bë një legjendë, me rrëshqitje dhe kontrata skandaloze, ku të tjerët kanë përfunduar në qeli”, tha Rama.
Për rrugën Tiranë-Elbasan e nisur në 2008 dhe ende e papërfunduar u arrestua pak muaj më parë ish-kreu i ARRSH, Dashamir Xhika, ndërsa janë marrë në pyetje dhe dy ish-ministra të Transporteve Haxhinasto dhe Dervishaj. Dashamir Xhika është në hetim edhe për rrugën Elbasan-Gjinar.
Kryeministri u shpreh se prioriteti i këtij mandati është punësimi. Ai tha se janë 1567 mijë vende të lira pune nga më të ndryshmet dhe numri i punësimeve nga Zyrat e Punës është rritur.
“Punësimin e kemi prioritetin numër një të këtij mandati. Janë 1567 mijë vende të lira pune nga më të ndryshmet. Faktikisht sot jo vetëm në Elbasan, por në të gjithë Shqipërinë kemi një rritje të punësimit dhe kemi një sistem që po bëhet efikas, siç janë Zyrat e Punës. Synimi ynë mbetet që të kemi 25 mijë vende punë deri në fund të këtij viti dhe mendoj se do arrijmë objektivin. Gjithashtu ka një rritje të punësimit nga ata që nuk marrin ndihmë ekonomike”- tha Rama.
ma.me
