Rrugën e jetës së tij, Mevlan Shanaj ka menduar ta ekranizojë në një dokumentar, i cili do të shfaqet nesër në Kinema Milenium.
Ai ka lindur në Patos të Fierit dhe në 1959 është vendosur në Tiranë. Për ata që s’e dinë, ka studiuar… mjekësi, madje ka punuar dy vite në spital.
Pasi u shkëput nga ky profesion, u mor gjerësisht me kinematografinë. Është një nga emrat më të rëndësishëm në këtë drejtim.
Në një intervistë të gjatë për “Dita”, Shanaj tregon se shqiptarët janë njerëz me temperament, me energji pozitive, por u mungon menaxhimi i mirë. Ai nuk mendon se të huajt mund të japin mend më shumë se sa shqiptarët.
“Unë them që Shqipërinë do e ndërtojmë ne, nuk e ndërtojnë mendtë e të huajve, nga të huajt duhet marrë përvoja më e mirë, të cilët padyshim e kanë shumë të sprovuar në të gjitha fushat e jetës”, tregon Shanaj.
Një pjesë të jetës ia ka marrë Televizioni Publik Shqiptar. Sot, kur i hedh sytë nga ajo godinë, ndjen dhimbje.
Asnjëherë nuk e kishte menduar se do të ç’personalizohej kaq shumë, për të cilin thotë se, sistematikisht politika e ka nëpërkëmbur.
Sot jeton mes Pogradecit dhe Tiranës.
“Qyteti i liqenit më jep qetësi dhe dorë në krijimtari. Së bashku me bashkëshorten, Natashën, e duam natyrën ndaj më shumë gjatë verës vendosemi atje”.
Ai e do Shqipërinë, me gjithë të metat e saj. I ka patur të gjitha mundësitë por nuk është larguar.
“Vetëm këtu mund të jap më të mirën time. Asnjë vend tjetër nuk ma fal këtë mundësi sa Shqipëria, ndaj as nuk më shkon ndërmend të largohem”.
Duke folur për shtetin, kineasti thotë se në Shqipëri, qeveria punon spontanisht.
“Puna është që nuk është i përsosur pasi e bënë punën në mënyrë spontane, selektive apo me fushata… Është e dhimbshme të diskutohet ende për nevojën e funksionimit korrekt të shtetit”, shton ai.
TEMA
