Dje pas mesnate (22 dhjetor) rrodhi një dokument që do ‘trondiste’ jo pak qytetarët e Shqipërisë. Nga hiçi, papritur kushdo kishte në duar një listë të pafundme me emrat e 637 mijë shqiptarëve që tregonte vendin ku punonte dhe sa fitonte gjithsecili.
Një kolpo e dytë kjo që morën banorët e këtij vendi brenda një viti, pas skandalit të muajit mars, kur u mor vesh se Partia Socialiste kishte një databazë me të dhëna të shumta e nga më të ndryshmet për qytetarët e thjeshtë, duke filluar që nga kartat e identitetit, e deri tek informacione se ku u punojnë familjarët e të afërmit. Gjë kjo, që përdorej për qëllime fushate e për mbledhje votash.
Tani, 8 muaj më vonë, shqiptarët u zgjuan me të tjera të dhëna të tyre sensitive të dala në shesh. Një dokument i quajtur “Rrogat – Janar 2021” ishte bërë viral në Ëhatsapp-in e kujtdo. Lista përmbante emër, mbiemër, vendin ku punon dhe rrogën për muajin janar të më shumë se 600 mijë shqiptarëve.
Ky ësht një ndër skandalet më të mëdha që ka përfshirë vendin tonë mbi vjedhjen e të dhënave personale. Ndarja e këtyre të dhënave shkaktoi shkeljen e privatësisë së kujtdo.
Sot në media, doli se nga analiza e dokumentit të shpërndarë në transfer ishte një user me emrin e Moza Seraj, por theksojmë se jo domosdoshmërisht është kjo personi që ka bërë shpërndarjen.
Megjithatë dokumenti “Rroga – Janar 2021” duket se është vetëm maja e ajsbergut. Sepse pritet të publikohen të dhëna të tjera, madje edhe më sensitive.
Më herët ditën e sotme Gazeta Shqip njoftoi se doli në qarkullim edhe lista me pagat për muajin prill të këtij viti. Edhe pse “Shqip” e posedon këtë dokument, nuk e publikoi për arsye etike dhe sensitiviteti të ngjarjes.
Po skandali u thellua edhe më keq, kur burime për Top News informuan se në listë do të jenë dhe numrat e telefonit të çdo qytetari.
Ka info se mund të dalin në shesh edhe llogaritë bankare të këtyre 637 mijë qytetarëve.
Kujtojmë se ditën e sotme kryeministri Edi Rama në një deklaratë për mediat tha se të dhënat kanë rrjedhur nga individë të brendshëm dhe nuk kemi të bëjmë me një sulm kibernetik./m.j
