Gjatë fundjavës së kaluar, një avion ushtarak kinez rrezikoi të përplasej me një aeroplan patrullimi të Forcës Detare të Vetëmbrojtjes së Japonisë në Paqësor, “duke fluturuar vetëm 45 metra larg këtij të fundit pasi u ngrit nga një aeroplanmbajtëse”, raporton Ministria Japoneze e Mbrojtjes.
Sipas raportimeve të La Repubblica, e njëjta Ministri shton se “të shtunën, 7 dhe të dielën, 8 qershor, avioni luftarak kinez J-15 nga aeroplanmbajtësja Shandong kreu edhe manovra të tjera të rrezikshme, për shembull duke kaluar përpara një P-3C japonez në të njëjtën lartësi dhe me vetëm një distancë prej rreth 900 metrash midis dy avionëve”.
Edhe pse nuk pati dëme në avionët japonezë ose lëndime në mesin e ekuipazhit, Japonia i ka “shprehur shqetësime serioze” Kinës sepse “këto qasje anormale mund të shkaktojnë një përplasje aksidentale”, vazhdon Ministria.
Pekini i hedh poshtë kritikat dhe në vend të kësaj pretendon se ishte avioni japonez që “u soll në një mënyrë të rrezikshme”. Manovra e fundit ajrore e njohur e këtij lloji ishte në qershor 2014, kur avionë luftarakë kinezë iu afruan 30 metra avionëve ushtarakë japonezë.
Incidentet ndodhën në të njëjtat ditë në të cilat dy aeroplanmbajtëse kineze, Shandong dhe Liaoning, u panë për herë të parë duke vepruar njëkohësisht në Paqësor, në zona të ndryshme, fundjavën e kaluar.
