Çmimi i naftës në vendin tonë shënoi këtë javë rekordin historik prej 234 Lekësh për litër.
Por këtë të dielë, në Tiranë, pati edhe pika karburanti që vijuan të rrisin çmimet deri në 241 Lekë për litër.
Nisur nga kjo situatë e krijuar, shoqata e hidrokarbureve sqaroi përmes një deklarate për shtyp se rritja e çmimit është e ndikuar nga bursat ndërkombëtare, ndaj të cilave është i varur edhe tregu shqiptar i karburanteve.
“Në fakt të gjitha vendet sot, ku çdo ekonomi është e integruar me njëra-tjetrën, po përballen me një inflacion që ka pësuar rritje të papritur, sidomos 10 ditët e fundit, që lidhet me ngjarjet e Ukrainës. Çmimet nga bazat grosiste rriten gradualisht, në koordinim me bursat dhe rezervat që kanë në gjendje pikat e karburanteve. Por rritja e çmimeve në bursa, javën e fundit ka qenë galopante. Pavarësisht rezervave 3-mujore, është e pamundur që çmimi të fiksohet në bazë të atij të ditës që hidhet në treg për konsum”.
Në vendet perëndimore, çmimi i naftës këtë javë pësoi rritje minimalisht me 20%. Litri i naftës në Shtetet e Bashkuara ditët e fundit preku çmimin më të lartë të dekadës së fundit prej 1.01 Dollarësh apo 3.84 Dollarë për gallon, njësia matëse e sasisë së karburanteve në këtë vend.
Rritje të lartë pati çmimi i naftës edhe në Kosovë e Maqedoni të veriut, ku javën e fundit u shënua rritje gati 2%. Këtë të dielë, çmimi i naftës bruto në bursa luhatet me 115 dhe 118 Dollarëve për fuçi, një diferencë jo shumë e lartë nga rekordi i 8 viteve të fundit i shënuar të enjten me 120 Dollarë për fuçi.
/b.h
