Komisioni për Veprimtarinë Prodhuese, Tregtinë dhe Mjedisin diskutoi projektligjin “Për sigurinë në punë, emergjencat e shpëtimin në veprimtarinë minerare dhe në ndërtimin e punimeve nëntokësore në veprat hidroenergjetike”.
Ky projektligj ka si qëllim të garantojë sigurinë dhe shëndetin e punonjësve, që kryejnë punë në veprimtarinë minerare dhe në punimet nëntokësore të veprave hidroenergjetike. Aktet ligjore e nënligjore që janë në fuqi për sigurinë në punë, adresuar kësaj kategorie janë të miratuara para disa viteve, ndaj ndryshimet e propozuara në këtë projektligj, janë në përputhje me etapat e zhvillimit të industrisë minerare dhe sipas standardeve evropiane.
Sipas relacionit që shoqëron këtë projektligj, ndryshimet ligjore merrin në konsideratë zhvillimet aktuale në ndërtimin e punimeve nëntokësore të veprave hidroenergjetike dhe nevojën e një rregullimi ligjor edhe për këto projekte.
Projektligji synon të garantojë sigurinë në punë, përballimin e emergjencave dhe shpëtimin në veprimtarinë minerare dhe në ndërtimin e punimeve nëntokësore të veprave hidroenergjetike.
Sot industria minerare dhe energjetike janë degë të rëndësishme të ekonomisë kombëtare, me shtrirje në të gjithë territorin e vendit. E drejta e ndërtimit dhe e shfrytëzimit të tyre është, tërësisht në duart e sektorit privat dhe vetëm e drejta e pronësisë mbi pasuritë natyrore është e shtetit. Pjesëmarrja e sektorit privat në këto industri ka sjellë një ndërthurje të re ndërmjet investitorëve dhe subjekteve kontraktore e nënkontraktore, që marrin pjesë në ndërtimin, shfrytëzimin e zhvillimin e kësaj industrie./a.m.
