Afro 15 mijë pensionistë në të gjithë vendin do të përfitojnë rritje pensioneve. Bëhet fjalë për 6 kategori, të cilat kanë mbushur moshën e daljes në pension, nga tetori i vitit 1993 deri në fund të dhjetorit 1996, e që do të marrin tashmë, sipas datave që ka propozuar Ministria e Mirëqenies Sociale dhe Rinisë e që gazeta i boton si më poshtë. Me vendimin e ri të miratuar nga qeveria është vendosur të ketë ngushtim të diferencave në masën e pensioneve, ndërkohë që pragu maksimal i përfitimit për të gjitha kategoritë është përcaktuar 23 640 lekë. Gjithashtu në vendimin e marrë dje, me argumentin për domosdoshmërinë së rritjes për shkak të nivelit shumë të ulët të pagesave që të moshuarit merrnin deri më sot. Ndërkohë përfitime specifike do të ketë, nga qershori edhe për ish-minatorët dhe gratë e punësuara në arsim e kulturë. Ky kontingjent, përveç rritjeve dhe indeksimeve të zakonshme do të përfitojnë edhe rritjet e diferencuara.
Rillogaritjet
a) Pensionet e plota të pleqërisë, të caktuara në periudhën nga 1.10.1993 deri në 31.12.1993, me masë pensioni në këtë periudhë nga 1 401 lekë deri në 2 474 lekë në muaj, shtohen me shuma fikse, duke arritur në masën 14 085 lekë deri në 23 640 lekë në muaj.
b) Pensionet e plota të pleqërisë, të caktuara në periudhën 1.1.1994 deri në 30.9.1994, me masë pensioni në këtë periudhë, pas rillogaritjes, nga 2 175 lekë deri në 3 840 lekë në muaj, shtohen me shuma fikse, duke arritur në masën 14 088 lekë deri në 23 640 lekë në muaj.
c) Pensionet e plota të pleqërisë, të caktuara në periudhën nga 1.10.1994 deri në 30.4.1995, me masë pensioni në këtë periudhë, pas rillogaritjes, nga 2 492 lekë deri në 4 400 lekë në muaj, shtohen me shuma fikse, duke arritur në masën 14 087 lekë deri në 23 640 lekë në muaj.
ç) Pensionet e plota të pleqërisë, të caktuara në periudhën nga 1.5.1995 deri në 30.9.1995, me masë pensioni në këtë periudhë, pas rillogaritjes, nga 2 741 lekë deri në 4 400 lekë në muaj, shtohen me shuma fikse, duke arritur në masën 14 086 lekë deri në 23 640 lekë në muaj.
d) Pensionet e plota të pleqërisë, të caktuara në periudhën nga 1.10.1995 deri në 31.3.1996, me masë pensioni në këtë periudhë, pas rillogaritjes, nga 3 070 lekë deri në 5 420 lekë në muaj, shtohen me shuma fikse, duke arritur në masën 14 088 lekë deri në 23 640 lekë në muaj.
dh) Pensionet e plota të pleqërisë, të caktuara në periudhën nga 1.4.1996 deri në 31.12.1996, me masë pensioni në këtë periudhë, pas rillogaritjes, nga 5 420 lekë në muaj, shtohen me shumë fikse, duke arritur në masën 23 640 lekë në muaj.
Për vjetërsi pune
Pensionet për vjetërsi shërbimi, kalojnë në masën 70 për qind të pagës që i është llogaritur pensioni, por jo më shumë se kufiri maksimal i pensionit të pleqërisë, të caktuar në ligj, pavarësisht kohës kur kanë kaluar me 70 për qind të pagës, përveç rritjeve dhe indeksimeve të zakonshme do të përfitojnë edhe rritjet e diferencuara që kanë përfituar të gjitha pensionet e plota të pleqërisë, të caktuara deri në datën 30 shtator 1993, në varësi të datës së fillimit të pensionit dhe masës së rivlerësuar këtij pensioni me 70 për qind të pagës. Pensionet e pleqërisë të punonjësve të nëntokës dhe ato të grave të punësuara në arsim dhe kulturë, kur llogariten si pensione të plota, pavarësisht kohës kur kanë kaluar si të tilla, përveç rritjeve dhe indeksimeve të zakonshme do të përfitojnë edhe rritjet e diferencuara që kanë përfituar të gjitha pensionet e plota të pleqërisë me datë fillimi në harkun kohor 1janar 1995 – 1 janar1997, përfshirë edhe rritjen në varësi të datës së fillimit të pensionit dhe masës së rivlerësuar si të plotë të këtij pensioni.
Rritja
Vendimi prek të moshuarit që janë mbi 80 vjeç, e që nga ky muaj e në vijim do të marrin shtesat e shpallura në vendim. Efektet financiare, janë llogaritur në masën 324 milionë lekë dhe sipas qeverisë, ato do të përballohen nga rezultati pozitiv financiar i Institutit të Sigurimeve Shoqërore për vitin 2015.
Kategoria 1
1 tetor 1993 – 31 dhjetor 1996 Ishte 1 401 – 2 474 lekë; Bëhet 14 085 – 23 640 lekë
Kategoria 2
1 janar 1994 – 30 shtator 1994 Ishte 2 175 – 3 840 lekë; Bëhet14 088 – 23 640 lekë
Kategoria 3
1 tetor 1994 – 30 prill 1995 Ishte 2 492 – 4 400 lekë; Bëhet14 087-23 640 lekë
Kategoria 4
1 maj 1995 – 30 shtator 1995 Ishte 2 741 – 4 400 lekë; Bëhet 14 086 – 23 640 lekë
Kategoria 5
1 tetor 1995 – 31 mars 1996 Ishte 3 070 – 5 420 lekë; Bëhet 14 088- 23 640 lekë
Kategoria 6
1 prill 1996 – 31 dhjetor 1996 Ishte 5 420 lekë; Bëhet 23 640 lekë
Neritan Gjergo
ma.me
