Rreth 20 mijë pensionistë që kanë dalë në pension në vitet 1993-1996 do të përfitojnë rritje të pensionit. Sipas drejtoreshës së Drejtorisë së Përfitimeve në Institutin e Sigurimeve Shoqërore, Solida Dibra, do të jenë tre kategori pensionistë që do përfitojnë nga kjo rritje. Do të jenë pikërisht ata të cilat i kanë pensionet më të ulëta se pjesa tjetër e që kanë punuar në të njëjtat kushte pasi nuk është bërë indeksim apo rritje pensionesh për këtë periudhë.
“Pensionet e plota të pleqërisë të caktuar me ligjin 7703 që vazhdojnë të jenë akoma sot në fuqi, kategorizojnë një tjetër grup, atë të minatorëve që kanë dalë në pension të parakohshëm në vitet ’95-’96 dhe gratë që kanë punuar në arsim dhe kulturë, por edhe këto në periudhën ’93-’96. Kategoria e tretë që përfiton janë ushtarakë në pension për vjetërsi shërbimi”, ka shpjeguar Solida Dibra
Drejtorja e Përfitimeve në ISSH shpjegon se qytetarët nuk duhet të përgatisin asnjë dokument dhe as të interesohen nëse janë përfitues, pasi do t’ju shpërndahet automatikisht.
“Do këshillonim një pjesë të mirë të qytetarëve që të mos paraqiteshin në zyrat tona, sidomos në periudhën qershor-gusht, ku ne kemi parashikuar një plan të mirëorganizuar masash sesi do të bëhet zbatimi i këtij vendimi. Gjatë kësaj periudhe strukturat tona rajonale në të gjithë Shqipërinë do të verifikojnë dhe përpunojnë rreth 100 mijë dosje”, ka thënë ajo për Ora News.
Fatura për rritjen e pensioneve për këto kategori do të jetë më shumë se 3 miliard lekë të vjetra vetëm për periudhën 6 mujore të mbetur nga 2016.
ma.me
